საქართველოში მეიარაღეობას ისეთივე დიდი ისტორია აქვს, როგორც თავად საქართველოს... არაერთ მსოფლიო ისტორიულ წყაროშია აღნიშნული, რომ უძველესი ხანიდან საქართველოში ლითონის დამუშავების უნიკალურ ტექნოლოგიებს ფლობდნენ, თუმცა რუსეთის მიერ საქართველოს ანექსიის შემდეგ ეს ხელოვნებაც ისევე დაიკარგა, როგორც ბევრი სხვა მნიშვნელოვანი დარგი. მაგრამ გამოჩნდნენ ადამიანები, რომლებმაც მთელი საქართველო ფეხით შემოიარეს, იარაღის დამზადების უნიკალური ქართული ტექნოლოგიის "ნარჩენები" შეკრიბეს, შეძლებისდაგვარად აღადგინეს, შემდეგ კი თაობებს გადასცეს. "ყველა სიახლე" ერთ-ერთი ასეთი ცნობილი ოსტატის, დაღესტნელი ნაბი მაგომედოვის მიერ გამოზრდილ ქართველ მჭედელ ზურაბ ბიჩინაგურს ესაუბრა.
- ბატონო ზურაბ, როდის დაინტერესდით ამ ხელოვნებით და რამ განაპირობა თქვენი ინტერესი, ოჯახური, საგვარეულო ტრადიცია ხომ არ იყო?
- საქართველოს დამოუკიდებლობის აღდგენის შემდეგ, 90-იან წლებში, სამოქალაქო ომის დროს, ისევე როგორც ქვეყნის მოსახლეობის უმეტესი ნაწილი, სამსახურის გარეშე დავრჩი. ოჯახის სარჩენად ფუნჯი მოვიმარჯვე და ნახატებით ხელში მშრალ ხიდს მივაშურე, სადაც მხატვრებთან ერთად, თბილისელებს იმავე მიზეზით გამოტანილი ჰქონდათ რელიკვიები, ანტიკვარული ნივთები და ათასი ძველმანი... სწორედ მაშინ მიიქცია ჩემი ყურადღება ისტორიულმა საბრძოლო იარაღმა და აღჭურვილობამ. საათობით ვათვალიერებდი წინაპართა მიერ შექმნილ სატევრებსა თუ ხმლების პირებს და მსოფლიოში ცნობილი ქართული სამჭედლო ხელოვნებით დავინტერესდი. იმ დროს თბილისში უცხოელები ნაკლებად ჩამოდიოდნენ და ოჯახებიდან გამოტანილ ისტორიულ ნივთებს, ქართულ იარაღს, ძირითადად, რუსი ოფიცრები ყიდულობდნენ, თანაც გროშებად. წლების გამო შელახულ იარაღს იწუნებდნენ კიდეც, მხოლოდ საუკეთესო ნიმუშებს იძენდნენ. ჩემი ნახატებით ნაშოვნი ფულით მე მხოლოდ ჟანგით დაფარული, უქარქაშო და უვადაჯვრო ხმალ-ხანჯლების შეძენა მოვახერხე, სწორედ ეს იარაღი გახდა ჩემი საქმიანობის დაწყების საფუძველი. როდესაც ამ საქმით დავინტერესდი, მშრალ ხიდზევე გამოტანილ წიგნებში წავაწყდი გერმანულ გამოცემას დასავლეთ ევროპის საკვეთი, საჭრელი, საჩხვლეტი, საძგერებელი და კომბინირებული საბრძოლო იარაღის შესახებ, სადაც ვნახე დიდი მხატვრების ალბრეხტ დიურერისა და ზებალდ ბეჰამის მიერ საუცხოოდ მოხატული იარაღი. ამან იარაღის კეთების შესწავლის ჟინი გამიმძაფრა. ასტვაცატურიანის წიგნით "კავკასიელი ხალხების იარაღი", სადაც მოყვანილია ძალზე მწირი ინფორმაცია ქართულ სკოლაზე. ავითვისე კალითა და მჟავით მუშაობის უმარტივესი ტექნოლოგია, მაგრამ ეს არ იყო ნაღდი, ძველი ოსტატების ნახელავისთვის დამახასიათებელი. ძიებამ თბილისის ერთ ძველ უბანში მიმიყვანა, სადაც ვიპოვე ნაბი მაგომედოვი – წარმოშობით ლეკი ოსტატი. მან მამამისთან ერთად მთელი საქართველოს მთიანეთი მოიარა და უხუცესებისგან შეისწავლა ქართული სამჭედლო ხელოვნების მთაში შემორჩენილი ნაწილი, შემდეგ კი თბილისში დასახლდა. მამამისი, ვერცხლზე მუშაობასთან ერთად, საყოფაცხოვრებო ნივთების მოკალვასაც მისდევდა და ბევრი დოსტ-მეგობარიც ჰყავდა ქართველ მთიელებში. ბატონმა ნაბიმ დაუზარლად და უანგაროდ შემასწავლა ვერცხლისა და სევადის საიდუმლოებანი, მაგრამ არც ეს აღმოჩნდა საკმარისი, რადგან ქართული და ზოგადად კავკასიური იარაღის მორთულობა ბევრ სხვა ტექნოლოგიასაც შეიცავს. ძიება გრძელდებოდა... არ შემიძლია ხაზგასმით არ გამოვყო ხევსურული შეიარაღებისა და საჭურვლის ფენომენი, რაც ჩემთვის გენეტიკურად ძალზე ახლობელი და სულიერად წარმმართველი იყო და არის.
- თქვენ გარდა კიდევ ვინ დაინტერესდა ქართული სამჭედლო ხელოვნების შესწავლით და მისი აღდგენით?
- თავდაპირველად, იშვიათად თუ ვინმეს აინტერესებდა საბრძოლო იარაღი, მით უმეტეს, მისი შესწავლა-კეთება, საბედნიეროდ, იყვნენ გამონაკლისებიც, ვინც სულითა და გულით ცდილობდნენ ქართული კულტურის ამ დარგში არსებული სიცარიელის შევსებას. მათ შორის იყო ცხონებული არნოლდ თეთრუაშვილი. ბატონი არნოლდი გამორჩეულად ხელმარჯვე ოსტატი გახლდათ, უფლისგან დაჯილდოებული საოცარი ნიჭითა და ინტელექტით. ახლა მის საქმეს მისი ვაჟი ლევანი აგრძელებს. ასევე არაჩვეულებრივი ოსტატია ბელგიაში მცხოვრები გოჩა ლაღიძე, რომელიც ცდილობს ქართული იარაღი და ჯავშან-აღჭურვილობა ევროპაში წარმოაჩინოს. ამ საქმეში ასევე დიდი წვლილი მიუძღვის ბორის თათეშვილს, ახალციხეში მოღვაწე ოსტატს, რომელმაც სამცხე-ჯავახეთის უხუცეს მჭედლებთან მოიძია და შეისწავლა სამჭედლო ნიუანსები. Aასევე, გორელ ზაქარია ნონიკაშვილს – "ბაწარაულის" დნობისა და ჭედვის ოსტატს, როლანდ ოდიშელიძესა და კახა ზარნაძეს. ყველა მათგანის წვლილი აღსანიშნავი და დასაფასებელია ქართული იარაღის შესწავლა-აღდგენა-აღორძინების საქმეში. ნელ-ნელა, დღითი დღე ივსება ცოდნის კიდობანი. თუმცა რამდენადაც მრავალფეროვანია ქართული ისტორიული საბრძოლო არსენალი, სამწუხაროდ, ამდენადვე დიდია თაობებით გადაცემული ცოდნის ჯაჭვის წყვეტა დროში... მაგრამ იმედია, შრომა, მეცადინეობა და დრო, უფლის წყალობით, ყოველივეს დაალაგებს და ქართული კულტურის ეს მნიშვნელოვანი დარგი პირვანდელი სახით აღორძინდება.
მარი ონეზაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)