პატრიარქი სკოლებში ანალიტიკური აზროვნების შესახებ საგნის სწავლების ინიციატივით გამოდის
სრულიად საქართველოს კათოლიკოს-პატრიარქი საჯარო სკოლებში ანალიტიკური აზროვნების შესახებ საგნის სწავლების ინიციატივით გამოდის. როგორც ილია მეორემ დღევანდელი საკვირაო ქადაგებისას ბრძანა, ახალგაზრდობას ანალიზის უნარი აკლია. პატრიარქის თქმით, მრავალი ახალგაზრდა ჩაირიცხა საშუალო თუ უმაღლეს სასწავლებლებში, თუმცა ისინი ნაკლებად ფიქრობენ, რისთვის უნდა ისწავლონ.
"მათ უნდა გაითავისონ ის პრობლემები, რომლის წინაშეც დგას ჩვენი ქვეყანა. წარსულს, დღევანდელ დღეს და მომავალს ანალიზი უნდა გავუკეთოთ. ვფიქრობ, ანალიტიკური აზროვნების საგანი საშუალო სკოლის ყველა კლასში უნდა ისწავლებოდეს - I-დან XII-ს ჩათვლით. ადამიანს ანალიზი უნდა ეხერხებოდეს", - ბრძანა უწმინდესმა.
პატრიარქის თქმით, ხშირად ადამიანები ანალიზს მას შემდეგ აკეთებენ, რაც ესა თუ ის მოვლენა უკვე მომხდარია. უწმინდესი მიიჩნევს, რომ ადამიანმა წინასწარ უნდა განსაზღვროს, რა შედეგი ექნება ნებისმიერ მოვლენას და თუ ის საშიშია, ყველაფერი უნდა გააკეთოს იმისთვის, რომ ეს არ დაუშვას.
"იმედია, ჩვენი ახალგაზრდობა ისწავლის არა იმისთვის, რომ დიპლომი მიიღოს და დიპლომიანი იყოს, არამედ, გააანალიზებს თავის როლს, ცხოვრებას და ისწავლის იმისთვის, რომ სწავლა და ცოდნა სამშობლოს სასარგებლოდ გამოიყენოს",- აღნიშნა უწმინდესმა.
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
