მიხეილ სააკაშვილი - პრემიერმა ჩვენს მიერ ორჯერ გახსნილი ჰესის მშენებლობა მესამეჯერ გახსნა
პრეზიდენტ მიხეილ სააკაშვილის განცხადებით, დღეს პრემიერ-მინისტრმა, ბიძინა ივანიშვილმა მესამედ გახსნა იმ ჰესის მშენებლობა, რომელიც მისმა მთავრობამ უკვე ორჯერ გახსნა. ამით მიხეილ სააკაშვილი საპარლამენტო უმცირესობასთან შეხვედრაზე პრემიერ-მინისტრის მიერ შუახევში, ახალი ჰესის მშენებლობისთვის საფუძველის ჩაყრას გამოეხმაურა.
"დღეს პრემიერმა მესამეჯერ გახსნა ჩვენს მიერ ორჯერ გახსნილი, 3 წლის წინ დაწყებული ჰესის მშენებლობა", - აღნიშნა სააკაშვილმა.
მისივე თქმით, ბიძინა ივანიშვილია ის პრემიერი, რომელმაც ბათუმის ტექნოლოგიური უნივერსიტეტი და თბილისის შემოვლითი რკინიგზა "გააჩერა".
"ეს ის პრემიერია, რომელიც მომავალს ართმევს ქუთაისს. აქ უნდა პარლამენტის "წამოღება" მხოლოდ იმის გამო, რომ თავის სასახლესთან ახლოს იქნება. ეს არის ის პრემიერი, რომელმაც პრაქტიკულად შეაჩერა სტრატეგიული რკინიგზის მშენებლობა ევროპაზე და სამაგიეროდ გველაპარაკება ევრაზიის კავშირში შესვლაზე",-განაცხადა მიხეილ სააკაშვილმა.
როგორც პრეზიდენტმა აღნიშნა, ამ სიტუაციაში თუ უმრავლესობამ პარლამენტში საკონსტიტუციო ცვლილების გატანა მოახერხა, საქართველოში პროგრესი საბოლოოდ გაჩერდება. "მოხდება პროგრესის საბოლოო გაჩერება და ხელისუფლების საბოლოო უზურპაცია, თუმცა, ეს, რა თქმა უნდა, გრძელვადიანი ვერ იქნება",-განაცხადა სააკაშვილმა.
LIVE: გია ხუხაშვილი "ნიუსრუმიდან"
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
