"რუსთავი 2"-ში გამნაღმველებმა კიდევ ერთი შემოწმება ჩაატარეს

ასაფეთქებელი მოწყობილობის არსებობის შესახებ 112-ის ცხელ ხაზზე დაფიქსირებული ანონიმური შეტყობინების გამო ტელეკომპანია "რუსთავი 2"-ში წუხელ კიდევ ერთი შემოწმება ჩატარდა. არხის საინფორმაციო სამსახურის ცნობით, ტელეკომპანიაში გამნაღმველები და კრიმინალისტთა ჯგუფი 03:00 საათისთვის, მას შემდეგ მივიდა, რაც "რუსთავი 2"-ში ბომბის არსებობის შესახებ საგანგებო სიტუაციების მართვის სამსახურში ზედიზედ სამი ზარი შევიდა.

"მოვიდა პოლიცია, ისევ მოვახდინეთ შენობის ევაკუაცია იმ ადამიანებისგან, ვინც ტელეკომპანიაში იმყოფებოდნენ. ჩატარდა შემოწმება, თუმცა საგანგაშო არაფერია – ნაღმი ისევ არ აღმოჩნდა", - აცხადებს "რუსთავი 2"-ის დაცვის სამსახურის უფროსი თემურ კოვზიაშვილი.

ტელეკომპანიის შენობაში გამნაღმველები წუხელ ორი საათის განმავლობაში მუშაობდნენ. ცრუ შეტყობინების გამო "რუსთავი 2"-ში შემოწმება უკვე მეოთხედ ჩატარდა.

"რუსთავი 2"-მდე განმაღმველები ტელეკომპანია "მაესტროში" იმყოფებოდნენ, რომელშიც ასაფეთქებელი მოწყობილობის არსებობის შესახებ 112-ის ცხელ ხაზზე გუშინ ორი ზარი შევიდა.

"ინტერპრესნიუსი"