დვანელები ე.წ. საზღვართან სამი სახლის დემონტაჟს ახორციელებენ

რეინტეგრაციის საკითხებში სახელმწიფო მინისტრის მოადგილე ქეთევან ციხელაშვილი და იუსტიციის მინისტრის მოადგილე გოჩა ლორთქიფანიძე სოფელ დვანის მოსახლეობას შეხვდნენ. ციხელაშვილი და ლორთქიფანიძე პირველად სოფლის განაპირა მხარეს მივიდნენ, სადაც დვანელები სამი სახლის დემონტაჟს ახორციელებენ, რადგან მათი სახლები, შესაძლოა, ე.წ. საზღვრის მეორე მხარეს მოექცეს. სამივე სახლი ოკუპირებული ტერიტორიის ე.წ. საზღვრის გასწვრივ მდებარეობს, ისინი 2008 წლის ომში გადაწვეს, თუმცა მესაკუთრეები სახლებით და სათავსოებით, ასევე ნაკვეთებით მაინც სარგებლობდნენ და იყენებდნენ.

როგორც ადგილობრივები აცხადებენ, ე.წ. საზღვარზე მავთულხლართები ჯერ კიდევ 2010 წელს გაკეთდა, თუმცა ოსური მხარე გეგმავს კიდევ 50 მეტრით გადმოწიოს ე.წ. საზღვარი. ამასთან აღსანიშნავია, რომ სახლების მეპატრონეებს ოსურმა მხარემ შესთავაზა ოსური პასპორტების აღება და საკუთარ სახლებში დარჩენა, თუმცა სამივე სახლის მეპატრონემ ამ შეთავაზებაზე უარი განაცხადა.

ამ დროისათვის სახლების მესაკუთრეები რკინის კონსტრუქციებს შლიან და ცდილობენ, მათ საკუთრებაში არსებული ყველა ნივთი გაიტანონ. ისინი მთავრობის წევრებს დახმარებას სთხოვენ. როგორც ციხელაშვილმა და ლორთქიფანიძემ დღეს ადგილობრივებთან საუბარში განაცხადეს, მთავრობა ყველანაირად შეეცდება მათ დაეხმაროს და სოციალური და ყოფითი პრობლემების მოგვარება საკუთარ თავზე აიღოს.

"ძალიან მძიმეა ეს სურათი და ტრაგიკული. ეს არის ტრაგედიის გაგრძელება რაც 2008 წელს მოხდა და წლების განმავლობაში უკვე 13-მდე სოფელია, სადაც პირდაპირ გაიარა მავთულხლართებმა. ჩვენი ამოცანა არის ორი, პირველი - დღესვე დეტალური ინფორმაცია მივაწოდოთ საერთაშორისო საზოგადოებას და ყურადღება არ მოდუნდეს ამ კუთხით. ამ თემაზე ჩვენ მუდმივად არ ვილაპარაკებთ, ვიდრე ამოცანა არ იქნება მიღწეული, ამოცანა კი არის დეოკუპაცია. მეორე ამოცანა არის ის, რომ ვიდრე ეს საკითხები ჩვენი მტკიცე, მშვიდობიანი პოლიტიკით იქნება მიღწეული, ადამიანებს დავეხმაროთ კონფლიქტისპირა სოფლებში, ეს იქნება წყალი, შეშა თუ სხვა რამ, იმიტომ რომ ჩვენი მოსახლეობა აქ უნდა იყოს, არსად წასვლას და არაფრის დათმობას არ ვაპირებთ, ამ ადამიანებს ნორმალური პირობები უნდა შევუქმნათ", - განაცხადა ქეთევან ციხელშვილმა.

დღესვე ციხელაშვილმა და ლორთქიფანიძემ სოფელ დვანში ის ტერიტორიაც დაათვალიერეს, სადაც ამ დროისათვის მავთულხლართების გასავლებად სამუშაოები მიმდინარეობს.

"მართლაც გაუსაძლისი ჰუმანიტარული მდგომარეობაა, რაც შეუძლებელია რომ გაგრძელდეს. ამას სჭირდება ორი ტიპის რეაქცია, ერთი, ამ მომენტისათვის ყოფითი სოციალური პრობლემები უნდა მოგვარდეს, ქონების და საკუთრების საკითხებს სჭირდება ყურადღება. რაც შეეხება იუსტიციის სამინისტროს, ჩვენ ჟენევის ფორმატში გამართულ მოლაპარაკებების დროს დვანის საკითხს პრინციპულად წამოვწევთ წინ", - განაცხადა გოჩა ლორთქიფანიძემ.

იხილეთ ფოტოგალერეა

"ინტერპრესნიუსი"