დვანში ქართველმა ჟურნალისტებმა რუსული ოკუპაცია გააპროტესტეს

სოფელ დვანში ქართველი ჟურნალისტების აქცია რუსული ოკუპაციის წინააღმდეგ დასრულდა. აქციის დასრულების შემდეგ მედიის წარმომადგენლებმა საოკუპაციო ხაზიდან სოფლის მოსახლებისკენ გადაინაცვლეს და დვნაში არსებულ ვითარებაზე ესაუბრნენ.

მედიის წარმომადგენლებმა ის სამი სახლიც მოინახულეს, რომლის დემონტაჟიც განხორციელდა. აღნიშნული სახლები, ოკუპირებულ ტერიტორიაზე, რამდენიმე დღის წინ მას შემდეგ მოექცა, რაც რუსმა მესაზღვრეებმა მავთულხლართები გაავლეს.

როგორც ადგილობრივები აცხადებენ, ორდღიანი ვადა, რომელიც რუსმა მესაზღვრეებმა ოკუპირებული ტერიტორიის დასაცლელად დააწესეს, ამაღამ იწურება.

იმ ტერიტორიაზე კი, სადაც ახლად გავლებული მავთულხლართებია, ქართველი მესაზღვრეები არიან განლაგებული, რომლებმაც მედიის წარმომადგენლებს მავთულხლართებთან მიახლოვების საშუალება არ მისცეს.

დვანელები მთავრობისგან დახმარებას ითხოვენ. აღნიშნული გზავნილი ხელისუფლების წარმომადგენლებს, მათ ჟურნალისტების მეშვეობით გაუზავნეს.

როგორც ადგილობრივები აცხადებენ, უკიდურეს მდგომარეობაში იმყოფებიან, რადგან სოფლის მოსახლეობას მთავრობის მხრიდან სათანადო ყურადღება არ ექცევა.

ქართველი ჟურნალისტების აქცია სოფელ დვანში, ე.წ საზღვართან დაახლოებით 3 საათის განმალობაში მიმდინარეობდა, რომელსაც საოკუპაციო ზოლის მიღმა მყოფი ოსური მედიის წარმომადგენლები იღებდნენ. ქართველმა ჟურნალისტებმა ცოცხალი ჯაჭვის ფონზე საქართველოს ჰიმნი შეასრულეს და რუსული ოკუპაცია ტრანფარანტებით გააპროტესტეს.

აქცია ლოზუნგით - "არა მცოცავ ოკუპაციას" სოციალურ ქსელში დაიგეგმა. აქციის განმავლობაში ტერიტორიაზე რუსი მესაზღვრეები არ გამოჩენილან, ასევე შეჩერებული იყო ე.წ. საზღვრის სადემარკაციო სამუშაოები.

"ინტერპრესნიუსი"