"ამერიკული დაცვის აყვანა ივანიშვილს აშშ-დან ურჩიეს"

ბიძინა ივანიშვილის უსაფრთხოების დაცვის გამკაცრებული ზომები, ხალხმრავალ აქციებზე ტრიბუნის გასწვრივ ტყვიაგაუმტარი მინა, შორიახლოს კი დაცვის ამერიკელი თანამშრომლების გამჭოლი მზერა, მავანთა განსჯის საგანი კარგა ხანია გახდა. არსებობს თუ არა გაოპოზიციონერებული მილიარდერის სიცოცხლის ხელყოფის რეალური საფრთხე, რატომ აიყვანა მაინცდამაინც ამერიკელი მცველები? - ამ და სხვა საინტერესო საკითხებზე "კვირის პალიტრას" გია ხუხაშვილი ესაუბრა:

- მოგეხსენებათ, ამერიკელები ამ საქმის პროფესიონალები არიან. ბატონ ბიძინას დღეს შერეული ჯგუფი იცავს, სადაც აბსოლუტური უმრავლესობა ქართველია. ვიცი, რომ ივანიშვილს ამერიკელი მცველების დაქირავება აშშ-დან ურჩია ერთმა გავლენიანმა პოლიტიკურმა ჯგუფმა.

ივანიშვილს ფიზიკური საფრთხე ნამდვილად ემუქრება. გახსოვთ, ალბათ, ჟურნალისტმა ვახტანგ კომახიძემ გაახმაურა შემაშფოთებელი ინფორმაცია, რომ ივანიშვილის ლიკვიდაცია იგეგმებოდა. სწორედ ამის შემდეგ ურჩიეს ივანიშვილს დაცვის გამკაცრება. ისედაც ცხადია, რომ საქართველოს ხელისუფლებისთვის არსებობს მხოლოდ ორი გზა ივანიშვილის ასპარეზიდან ჩამოსაცილებლად, - მისი ფიზიკური ან პოლიტიკური ლიკვიდაცია. ვფიქრობ, აქციებმა ცხადყო, რომ ხელისუფლებას არ ძალუძს ივანიშვილის პოლიტიკური ლიკვიდაცია, ამდენად მისი ფიზიკური განადგურების შესაძლებლობა გამორიცხული არ არის.

- აქციებზე ტყვიაგაუმტარი მინების აღმართვა რამ განაპირობა?

- ხალხმრავალ მიტინგებზე დიდია მისი ხელყოფის ალბათობა. სხვათა შორის, ვახტანგ კომახიძემ დააზუსტა მეთოდი, რომელიც შესაძლოა ხალხმრავალ ადგილებში აამოქმედონ. კერძოდ, ყოველთვის შეიძლება ივანიშვილის ლიკვიდირებისთვის გამოიყენონ ფსიქიკურად გაუწონასწორებელი პირი (თუნდაც ციხიდან დროებით გამოშვებული), რომელიც მხოლოდ საკუთარ თავზე აიღებს დანაშაულს. ასეთი პრეცედენტები მსოფლიოს ისტორიაში არაერთხელ ყოფილა. ვაცხადებ, დაცვამ ივანიშვილის ტრიბუნის გარშემო ტყვიაგაუმტარი მინების აღმართვის გადაწყვეტილება სავსებით სწორად მიიღო. არავინ იცის, ხელისუფლების გაცხელებულ თავში რა უგუნური იდეები გაჩნდება.

- ბატონო გია, თქვენი ბინის ჭერიდან მოსასმენი აპარატურა ამოიღეს. მაინცდამაინც არც თქვენ ყოფილხართ დაცული.

- დიახ, ამ ზომის აპარატურით ადრე კა-გე-ბე უსმენდა დაკვირვების ობიექტს, XXI საუკუნემ უფრო თანამედროვე ტექნიკური აღჭურვილობები მოიტანა. მაგრამ ჩვენი ხელისუფლება იმდენ ადამიანს უსმენს, რომ თანამედროვე აპარატურა აღარ ჰყოფნის.

პატარა მოსასმენ აპარატს კვების ბლოკი და დამატებითი მოწყობილობა სჭირდება, რომ ვთქვათ, ავტომობილში მყოფმა მოუსმინო ადამიანს.

ჩემს ბინაში კი ისეთი მძლავრი ტექნიკური აღჭურვილობა დაუმონტაჟებიათ, რომელიც არათუ კილომეტრების დაშორებით იძლევა მოსმენის საშუალებას, არამედ მიმდინარე საუბრის ონლაინრეჟიმით "რუსთავი 2"-ის პირდაპირ ეთერში ჩართვის შესაძლებლობასაც აჩენს. სხვათა შორის, ამავე კორპუსში ცხოვრობენ დავით კეზერაშვილი, გია ჭანტურია, ირაკლი ალასანია.

როგორც ვთქვი, ჩემი ძაღლი ბიძინა ივანიშვილის ძაღლთან მეგობრობს, ხანდახან მასთან ერთად თამაშობს და, ალბათ, ამის გამოც აკვირდებიან... (იცინის). მოკლედ, ის დროა, ჩემი ძაღლისთვის პოლიტიკური თავშესაფარი მოვითხოვო, რადგან ამ ქვეყანაში უკვე ძაღლურად ცხოვრებაც აღარ შეიძლება.

"კვირის პალიტრა" შეეცადა ინფორმაცია მოეპოვებინა აშშ-ში დაცვის სამსახურების შესახებ, რომლებიც VIP-კლიენტებს იცავენ.

რა განსხვავებაა მათსა და ქართველ მცველებს შორის? გვყავს თუ არა საქართველოში კვალიფიციური კადრები? რა მიზნით ქირაობენ თანამდებობის პირები მცველებს? - ამის თაობაზე სააკაშვილის ხელისუფლების ყოფილი წევრებისგან საინტერესო მოსაზრებები მოვისმინეთ. ერთ-ერთი მათგანი აშშ-ში გადახვეწილი გოჩა ვეტრიაკოვია, რომელსაც მაღალი თანამდებობები ეკავა როგორც უშიშროების, ასევე თავდაცვის სამინისტროებში. ის ამჟამად ამერიკის სამხედრო უნივერსიტეტის უსაფრთხოებისა და გლობალური კვლევების კურსდამთავრებულია.

გოჩა ვეტრიაკოვი: "ამერიკელებს მაღალ დონეზე აქვთ ცხელ წერტილებში დაცვის უკეთ ორგანიზების უნარი. აშშ-ის პრესტიჟულ ფირმებში მუშაობენ სახელმწიფო სტრუქტურებში - სპეცსამსახურში, პოლიციაში ან არმიაში ნამუშევარი პირები. ჩანს, ბიძინა ივანიშვილის მცველებიც ასეთ ფირმაში დაიქირავეს.

საქართველოში პროფესიონალი მცველების დეფიციტია. ქართველი თანამდებობის პირები მცველებს იმიტომ ქირაობენ, რომ თავში მუშტი არ მოხვდეთ. დაცვის წევრები ფიზიკური ხელშეუხებლობის გარდა მეტს ვერაფერს უზრუნველყოფენ. ინტერნეტით გავრცელდა ფოტო, როგორ მგზავრობს ერთ-ერთი ცივილიზებული ქვეყნის ქალაქის მერი საზოგადოებრივი ტრანსპორტით. თბილისში ეს წარმოუდგენელია. უგულავამ რომ გარისკოს და დაცვის გარეშე გაიაროს, შეიძლება მაგრად მოხვდეს...

იხილეთ ვრცლად