სოზარ სუბარი - კადრების გავრცელება უკვე კანონდარღვევაა

როგორ გავრცელდა ბაჩო ახალაიას საკანში გადაღებული ვიდეომასალა, ამას პასუხი გაეცემა, - ამის შესახებ ჟურნალისტებს სასჯელაღსრულების, პრობაციისა და იურიდიული დახმარების საკითხთა მინისტრმა სოზარ სუბარმა განუცხადა.

მისივე თქმით, აღნიშნულზე გამოძიება უკვე დაწყებულია. "მოკვლევა დაწყებულია სხვადასხვა უწყებების მიერ. როგორ გავრცელდა ეს ვიდეო, ამას პასუხი გაეცემა. ის, რომ კადრები გავრცელდა, უკვე კანონდარღვევაა, რადგან ამით დარღვეულია გარკვეული კონფიდენციალურობის უფლება", - აღნიშნა სუბარმა.

ამასთან, მინისტრის განცხადებით, სამინისტრო ახალაიას საკანზე ვიდეო და აუდიო კონტროლს კანონიერად ახორციელებდა.

"პატიმრობის შესახებ" კოდექსის მე-9 მუხლი იცნობს ვიზუალურ და ელექტრონულ თვალთვალს. ვიზუალური ნიშნავს, როცა აკვირდები თვალით და ელექტრონული ნიშნავს ყველანაირი სხვა საშუალების გამოყენებას, რაც სხვა კანონებშია განმარტებული. ამის გაკეთება საჭირო გახდა თვითონ ახალაიას განცხადებიდან გამომდინარე, რომ მას ემუქრებოდა საფრთხე. ამის შესახებ ის იყო გაფრთხილებული", - განაცხადა სუბარმა.

რაც შეეხება ადვოკატების მოთხოვნას, სოზარ სუბარის პასუხისმგებლობაში მიცემასთან დაკავშირებით, მინისტრის აზრით, "გოგა ონიანი სერიოზული პასუხის გაცემის ღირსი არაა, რადგან ისაა ადამიანი, რომელიც დარბოდა და არბევდა მიტინგებს".

"ინტერპრესნიუსი"