ქართველი მომღერლები, ლოზუნგით "არა ოკუპაციას" საპროტესტო აქცია-კონცერტს გამართავენ

"არა ოკუპაციას" და "ბოიკოტი სოჭის ოლიმპიადას" - ამ ლოზუნგებით თბილისში, ვარდების რევოლუციის მოედანზე ქართველი მომღერლები საპროტესტო აქცია-კონცერტს გამართავენ.

დღევანდელ აქციაზე გაგრძელდება ხელმოწერები პეტიციაზეც, რომლის მეშვეობითაც მოქალაქეები მთავრობას მოუწოდებენ, უარი თქვას სოჭის ოლიმპიადაზე მონაწილეობაზე.

როგორც აქციის ერთ-ერთი ორგანიზაროტი აჩიკო გულედანი აცხადებს, მუსიკოსებმა საზოგადოებისთვის მიმართვისთვის ასეთი ფორმა აირჩიეს. "შეიძლება ბევრი სხვა ფორმა მოვიფიქროთ, მაგრამ მუსიკოსებმა მუსიკალური ფორმა ავირჩიეთ, რათა საზოგადოებას მივმართოთ. არ ვართ ცოტანი, ვინც ვიძახით - არა ოკუპაციას", - აღნიშნა გულედანმა.

აქცია-კონცერტში მონაწილეობას მიიღებენ ნიაზ დიასამიძე და 33ა, "გამოუვალი მდგომარეობა", ქეთათო, ზუმბა, ლადო ბურდული, Green Room და სხვა მუსიკალური ჯგუფები და მომღერლები.

"ინტერპრესნიუსი"