რა აღმოაჩინეს სააკაძის დაღმართის გადათხრისას
საქართველოს დედაქალაქში გადათხრილი ქუჩების სიმრავლე უკვე თვალში საცემია - ზოგან გზის საფარის რეაბილიტაცია მიმდინარეობს, ზოგან კი საკანალიზაციო მილების შეკეთება. ეს ყველაფერი ძალიან კარგია, თუმცა სამუშაო პროცესი, რომელიც რატომღაც ნელი ტემპით მიმდინარეობს, ტრანსპორტის მოძრაობის შეფერხებასა და მოძრაობის სერიოზულ პრობლემებს ქმნის, რაც ჩვენი თანამოქალაქეების გაღიზიანებას იწვევს.
მაგალითად, სააკაძის დაღმართზე მიმდინარე სარეაბილიტაციო სამუშაოები გზის ერთი ნაწილის პარალიზებას იწვევს და ტრანსპორტის მოძრაობას აფერხებს, რაც თავისთავად საცობებს ქმნის, განსაკუთრებით საღამოს საათებში. ამ კონკრეტული ობიექტით იმიტომ დავინტერესდი, რომ რჩება შთაბეჭდილება - ხშირ შემთხვევაში იქ არავინ მუშაობს.
"თითქმის ყოველდღე მიწევს ამ გზის გავლა და მუდმივად ვაწყდები პრობლემებს, გზის ამხელა მონაკვეთის გადაკეტვა სრულ ქაოსს ქმნის, კარგია თუ აკეთებენ, მაგრამ ასეთი დაუსრულებელი რა კეთდება? ვერც მუშებს ვხედავ, რომ ვკითხო, რას აკეთებენ. უკვე თვეებია ასე გრძელდება, იმედია მალე დაადგება საშველი და მოგვეცემა ნორმალური გადაადგილების საშუალება" - ამბობს ერთ-ერთი მძღოლი.
იმის გასარკვევად, თუ რა სამუშაოები მიმდინარეობს სააკაძის დაღმართზე, მერიის პრესცენტრს მივმართე, საიდანაც წერილობითი პასუხი მივიღე:
"სააკაძის დაღმართზე მიმდინარეობს რკინაბეტონის სანიაღვრე კოლექტორის (კვეთით 2X2 მ) მოწყობის სამუშაოები, რომელიც მოიცავს დაზიანებული გზის საფარის რეაბილიტაციასაც. სამუშაოები დაწყებულია მიმდინარე წლის აგვისტოში.
სამუშაოები მიმდინარეობს საპროექტო დოკუმენტაციის მიხედვით, გზის ნიშნულიდან 2,5-3 მეტრის სიღრმეზე, შემოღობილ უბანზე, რის გამოც ვიზუალურად მუშა პროცესის სრულყოფილად დანახვა შეუძლებელია. ამასთან ერთად, სამუშაოთა პროცესი შეფერხდა მიწისქვეშ აღმოჩენილი ძველი, გეგმებზე დაუტანელი კომუნიკაციების გამო, რომლის გათვალისწინება პროექტში შეუძლებელი იყო. სამუშაოების დასრულება ხელშეკრულებით გათვალისწინებულია მიმდინარე წლის ნოემბერში. ვადის დარღვევის შემთხვევაში გატარებული იქნება ხელშეკრულებით გათვალისწინებული ზომები.
ზოგადად, მსგავსი სარეაბილიტაციო სამუშაოები წარმოებს საპროექტო დოკუმენტაციის და სამშენებლო ორგანიზაციასთან გაფორმებული ხელშეკრულების პირობების შესაბამისად. ვადების დარღვევის შემთხვევაში, გაფრთხილების შემდეგ ტარდება ხელშეკრულებით გათვალისწინებული ზომები, მათ შორის საჯარიმო სანქციები", - ნათქვამია პრესცენტრის განცხადებაში.
ირაკლი როსტომაშვილი, - მენაშენეთა ასოციაციის პრეზიდენტი: "მოგეხსენებათ, რომ თბილისში წყლისა და საკანალიზაციო კომუნიკაცია გაყვანილი არ იყო. მე-20 საუკუნის დასაწყისში საინჟინრო კომუნიკაციების გაკეთებამ საერთოდ მოსპო ყველაფერი. ისედაც არასწორად ჩამონტაჟებული მილების გაფუჭებას ხელი შეუწყო ბოლო დროს მომხდარმა მიწისძვრებმაც - დაზიანებულია სანიაღვრე სისტემები, ასევე თვითდინებით მიდის ფეკალური წყლები.
უბედურება ის არის, რომ საინჟინრო მიმართულება სადღაც ბოლოშია გადასროლილი და ამაზე არავინ ფიქრობს, არც ქვეყანაში და არც მერიის მასშტაბით არ არსებობს სპეციალური საინჟინრო სამსახური. არადა, განვითარებულ ქვეყნებში არქიტექტორთა საინჟინრო სამსახური ყველაზე ძლიერია, ჩვენთან კი ეს სფერო უგულებელყოფილია.
სხვადასხვა ადგილას ეს სარეაბილიტაციო სამუშაოები მუდმივად მიმდინარეობს, რადგან ერთიანად ამის მოგვარებას დიდი თანხები სჭირდება. ამიტომ, როცა გააკეთებენ ერთს, ფუჭდება მეორე და პროცესი ხდება უსასრულო. ამას ზედ ერთვის პროფესიული კადრების არარსებობაც, რაც ძალიან მნიშვნელოვანია ამ პრობლემების მოსაგვარებლად".
მაკა ქობალია
ყოველკვირეული გაზეთი "ყველა სიახლე"
(გამოდის ოთხშაბათობით)
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
