83 წლის იულია სმირნოვას, რომელსაც ორი შვილი, შვილიშვილი და შვილთაშვილი ჰყავს, ოჯახის წევრებთან უსიამოვნება აქვს, რადგან 13 კატასთან ერთად ცხოვრობს და საყვარელი ცხოველების დათმობას სიკვდილამდე არ აპირებს - მიიჩნევს, რომ ისინი მისი მკურნალი ექიმები არიან. კონფლიქტმა იმდენად მწვავე სახე მიიღო, რომ ბინაც კი ორად გაიყო...
- ორი შვილი მყავს, ბიჭი რუსეთში ცხოვრობს, გოგო - აქ. 5 წელია ოჯახის წევრებს არ ველაპარაკები. ბინა გავყავით. კანონით 27 კვ. მეტრი მეკუთვნის, მაგრამ 20 კვმ ოთახში ვცხოვრობ. ჩემს ოთახში რომ შევიდე, მათი ოთახის გავლა მიწევს, მაგრამ ისე გავდივარ, მათი ოთახისკენ არც კი ვიყურები.
- რა გახდა ამის მიზეზი?
- მეუბნებიან, კატები ცხოველთა თავშესაფარში ჩააბარე, სახლში სიბინძურეაო, არადა, ჩემი კატები არავის აწუხებენ, ოთახიდანაც კი არ გამოდიან, შვილებივით ვუვლი. ერთი იმათ ოთახში შედით და ნახეთ, თუ უკეთესი სუნია! სამზარეულო ვირთხებითაა სავსე, რა, კატებს ვირთხები ჯობია?
- კატების წართმევა თუ მოინდომეს, რას იზამთ?
- მემუქრებიან წაგართმევთო, მაგრამ აბა ერთი წამართვან! ნევროზისგან განმკურნეს და მათი წყალობით წნევაც აღარ მაწუხებს. მე რომ მოვკვდები, ჩემმა შვილებმა რაც უნდათ, ის ქნან, მაგრამ სანამ ცოცხალი ვარ, ჩემი კატები ჩემთან დარჩებიან.
მაკა ქობალია
ყოველკვირეული გაზეთი "ყველა სიახლე"
(გამოდის ოთხშაბათობით)