რუსეთში მოსახლეობის უმრავლესობა მიიჩნევს, რომ საქართველოში ახალი პრეზიდენტის მოსვლის შემდეგ ურთიერთობები გაუმჯობესდება

რუსეთის მოსახლეობის უმრავლესობა მიიჩნევს, რომ საქართველოში ახალი პრეზიდენტის მოსვლის შემდეგ რუსეთ-საქართველოს შორის ურთიერთობები გაუმჯობესდება. ამის შესახებ რუსული მედია იუწყება.

რუსეთის საზოგადოებრივი აზრის შემსწავლელი ცენტრის (ВЦИОМ) მიერ ჩატარებული გამოკითხვის მონაცემებით, გამოკითხული მოსახლეობის 56% მოელის, რომ საქართველოში ახალი პრეზიდენტის არჩევის შემდეგ რუსეთ-საქართველოს შორის ურთიერთობა გაუმჯობესდება. ამ მხრივ, ნეგატიურ პროგნოზს აკეთებს რუსეთის მოსახლეობის 7%, გამოკითხულთა 23 პროცენტი კი მიიჩნევს, რომ ახალი პრეზიდენტის არჩევით ორ ქვეყანას შორის ურთიერთობაში არაფერი შეიცვლება.

ამასთან, ВЦИОМ-ის გამოკითვის თანახმად, რუსეთ-საქართველოს ორმხრივ ურთიერთობებს რესპონდენტები ხუთქულიანი შკალით 2,74 ქულით აფასებენ.

რუსეთის მოსახლეობის 44% მიიჩნევს, რომ საქართველოს ნატო-ში გაწევრიანება რუსეთ-საქართველოს ურთიერთობაზე ნეგატიურად აისახება, საპირისპირო აზრი აქვს რესპოდენტთა 13%-ს.

"უნდა აღინიშნოს, რომ გამოკითხულთა 35%-ის აზრით, საქართველოს ევროკავშირში გაწევრიანება არანაირად არ აისახება რუსეთ-საქართველოს ურთიერთობაზე, 29% მიიჩნევს, რომ ეს ნეგატიურად აისახება, 17 პროცენტი კი პოზიტიურად", - ნათქვამია ВЦИОМ-ის მიერ გავრცელებულ განცხადებაში.

რუსეთის საზოგადოებრივი აზრის შემსწავლელმა ცენტრმა გამოკითხვა 2-3 ნოემბერს ჩაატარა და ქვეყნის 42 რეგიონის 130 დასახლებულ პუნქტში 1 300 ადამიანი გამოკითხა.

"ინტერპრესნიუსი"