ვახტანგ ხმალაძე: "ბორდელები უნდა დაიხუროს"
საქართველოში საროსკიპოები რომ მომრავლდა, ფაქტია. ამ თემის განხილვა მიმდინარეობს ყველგან - მედიით დაწყებული და ინტერნეტსივრცით დამთავრებული. სხვათა შორის, სოციალურ ქსელებში გამოითქვა მოსაზრება - ხომ არ გვეფიქრა პროსტიტუციის ლეგალიზაციაზე. ამ იდეის ავტორებს თავიანთი არგუმენტების გასამყარებლად ევროპის მაგალითი მოჰყავთ.
"ყველა სიახლე" დაინტერესდა, რას ფიქრობენ ამ თემაზე ჩვენი თანამოქალაქეები. რესპონდენტთა დაახლოებით 90% კატეგორიულად წინააღმდეგია ზემოხსენებული საკითხის განხილვისაც კი, თუმცა არიან გამონაკლისებიც.
თამაზ ლ. (35 წლის, მათემატიკოსი): "როგორც არ უნდა გამკაცრდეს კანონმდებლობა, ფაქტია, რომ სექსბიზნესი საქართველოში იყო, არის და იქნება. არც ის არის ვინმესთვის საიდუმლო, რომ სასტუმროების დიდი ნაწილი ბორდელია. ჰოდა, მეძავებს გადასახადი მაინც გადავახდევინოთ".
ლევან გ. (41 წლის, ისტორიკოსი): "საქართველოში დღეს ამის გაკეთება წარმოუდგენელია - თბილისის რომელიმე უბანში ლეგალური რომ გახდეს პროსტიტუცია, ალბათ, დალეწავენ იქაურობას. თუმცა სამომავლოდ, შესაძლოა, სახელმწიფო მივიდეს იმ დასკვნამდე, რომ სჯობს სექსბიზნესი ლეგალური იყოს, ვიდრე იატაკქვეშეთში არსებობდეს და დაუსრულებელი კრიმინალის წყარო იყოს. თუმცა ფსიქოლოგები მიიჩნევენ, რომ სასწაულიც რომ მოხდეს და საქართველოში სექსბიზნესი ლეგალური გახდეს, ეს სიტუაციას დიდად ვერ შეცვლის.
"ჩემი აზრით, ქართველი კაცი საქართველოში ლეგალურ ბორდელში არ შევა იმის შიშით, რომ ვინმემ არ იცნოს. თუ საქართველოში ლეგალური ბორდელები გაიხსნა, მისი კლიენტურა ძირითადად უცხოელები იქნებიან. ხომ წარმოგიდგენიათ, ეს რას გამოიწვევს საქართველოში?! ვინც დღეს პროსტიტუციის ლეგალიზაციაზე საუბრობს, ან სულელია, ან სპეციალურად აკეთებს. შესაძლოა, ზოგიერთი არასამთავრობო ორგანიზაცია ამ თემით გრანტების ახალ წყაროებზე გასვლას გეგმავს. ჯერ თემას სოცქსელების მეშვეობით ამუშავებენ, შემდეგ კი ალბათ, ამ საკითხზე პრესკონფერენციებსაც გამართავენ", - აცხადებს ფსიქოლოგი გელა ცერცვაძე.
"ყველა სიახლე" იმ პოლიტიკოსთა აზრითაც დაინტერესდა, რომლებიც საქართველოში პროსტიტუციის პრობლემასთან დაკავშირებით რადიკალიზმით და მწვავე განცხადებებით გამოირჩევიან.
ჯონდი ბაღათურია, "ქართული დასის" თავმჯდომარე:
- სუტენიორობით ნაშოვნი ფული სახლში რომ მიაქვს, ისეთ კაცთან ერთად სუფრასთან არც უნდა დაჯდე. ან იმ სახელმწიფოს რა ვუთხარი, ბორდელებიდან დღგ-ს რომ ამოიღებს და მეძავს საშემოსავლოს გადაახდევინებს.
ირაკლი წერეთელი:
- როგორც არ უნდა გაუჭირდეს, რა სოციალური ფონიც არ უნდა იყოს, ქართველმა ქალმა უნდა იცხოვროს როგორც ქრისტიანმა. პარლამენტი თუ დააკანონებს პროსტიტუციას, ის იქნება პასუხისმგებელი ღვთის, ერისა და ისტორიის წინაშე. ისე, დაკანონებული ბორდელი ნაკლებად საშიშია, ვიდრე უკანონო.
ჩვენ საქართველოს ხელისუფლების წარმომადგენლების აზრითაც დავინტერესდით.
ვახტანგ ხმალაძე, პარლამენტის იურიდიულ საკითხთა კომიტეტის თავმჯდომარე:
- ბორდელები უნდა დაიხუროს, ეს აკრძალული საქმიანობაა, მაგრამ, სამწუხაროდ, ხელისუფლება წლების განმავლობაში არაფერს აკეთებდა ამის აღსაკვეთად. ყველამ იცის, აჭარაში რაც ხდება. ვფიქრობ, ამას ბოლო უნდა მოეღოს. მე ვერ ვხედავ პროსტიტუციის ლეგალიზების და ბორდელების დაშვების საჭიროებას ქვეყანაში. არა მგონია, ამან ზნეობისთვის სასარგებლო შედეგი მოიტანოს.
ყველაზე ძვირადღირებული მეძავი
ინტერნეტბლოგერებმა მსოფლიოში ყველაზე ძვირადღირებული მეძავის არაოფიციალური სტატუსი 22 წლის ამერიკელ გოგონა ნატალის მიანიჭეს. ის თავის ქალიშვილობას 3,7 მილიონ დოლარად ყიდდა (გაყიდა თუ არა, უცნობია). ფული მას სწავლის გაგრძელებისთვის სჭირდებოდა. სხვათა შორის, მისმა დამ, ავიამ სწავლის ფული სწორედ ბორდელებში იშოვა.
ყველაზე ხანდაზმული მეძავი
მსოფლიოში ყველაზე ხანდაზმულ მეძავად ბრიტანელი მილი კუპერია აღიარებული. მან ეს საქმიანობა ჯერ კიდევ მეორე მსოფლიო ომისას დაიწყო. კუპერის თქმით, თავისი "კარიერის" განმავლობაში ის დაახლოებით 3500 მამაკაცს მოემსახურა. მილი კუპერი ამჟამად 96 წლისაა. გაგიკვირდებათ და, ის დღესაც აგრძელებს სექსსაქმიანობას. კვირაში ორ მამაკაცს ემსახურება და საათში 1200 დოლარს იღებს.
ნანა ფიცხელაური
ყოველკვირეული გაზეთი "ყველა სიახლე"
(გამოდის ოთხშაბათობით)
დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა
"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?
