თამარ კორძაია - თვითმმართველობის კოდექსი დამღუპველი არ იქნება

საზოგადოებას სრულიად შემაშფოთებლად აწვდიან ინფორმაციას თითქოს თვითმმართველობის რეფორმა ქვეყნის დაშლას გამოიწვევს , - ასე უპასუხა საპარლამენტო უმრავლესობის წევრმა თამარ კორძაიამ ჟურნალისტის კითხვას, რომელიც პატრიარქის გუშინდელ განცხადებას შეეხებოდა. მისი თქმით, მას არც ერთი სერიოზული არგუმენტი არ მოუსმენია რატომ გამოიწვევს კანონი მიღების შემთხვევაში ქვეყნის დაშლას.

"ვერ გავიზიარებ პოზიციას იმასთან დაკავშირებით, რომ ეს კანონი დაიწერა და განიხილებოდა ფარულად. კანონპროექტის ავტორები რეგიონებში ატარებდნენ შეხვედრებს სწორედ ამ საკითხზე. ვერ გავიზიარებ იმ მოსაზრებებს, როდესაც საზოგადოებას სრულიად დაუსაბუთებლად აწვდიან შემაშფოთებელ ინფორმაციას თითქოს ეს გამოიწვევს ქვეყნის დაშლას. ამასთან დაკავშირებით მე არ მომისმენია არც ერთი სერიოზული არგუმენტი, საქმიანი მოსაზრება, ამიტომაც მაქვს მსგავსი რეაქცია როდესაც ვისმენ, რომ შესაძლოა ეს კანონი დამღუპველი იყოს ჩვენი ქვეყნისთვის. დამღუპველი არ იქნება ეს ფაქტია და პირიქით, დაპირება იყო ხელისუფლების, რომ ძირეული რეფორმა მოხდებოდა", - განაცხადა კორძაიამ და აღნიშნა, რომ ასევე დაუსაბუთებელია მოსაზრებები სეპარატიზმის საფრთხესთან დაკავშირებით.

რაც შეეხება ცვლილებებს წარმოდგენილ კანონპროექტში, როგორც კორძაია აცხადებს, ის შეიძლება გონივრული აზრის წარმოდგენის შემთხვევაში მოხდეს.

"ცვლილება შესაძლოა განხორციელდეს ნებისმიერი გონივრული აზრის მოსმენის შემდეგ. დღევანდელ პარლამენტს არ შეიძლება ბრალი დასდო იმაში, რომ ის საზოგადოებასთან არ თანამშრომლობს. ყველა კანონი საზოგადოების აქტიური მონაწილეობის შედეგად იყო მიღებული", - განაცხადა კორძაიამ.

საქართველოს კათოლიკოს-პატრიარქმა, უწმინდესმა და უნეტარესმა ილია მეორემ თვითმმართველობის კოდექსის პროექტზე გუშინ ისაუბრა. როგორც პატრიარქმა აღნიშნა, თუ კანონი განხორციელდა, ეს საქართველოს დაშლა იქნება.

ამის საპასუხოდ, თამარ კორძაიამ გუშინ განაცხადა, რომ საპატრიარქო ზედმეტად ერევა ხელისუფლების საქმიანობაში.

"ინტერპრესნიუსი"