საქართველოში გამოკითხულთა 34,6% ქმრის მხრიდან ცოლის ცემას ამართლებს
სასტუმრო "ქორთიარდ მარიოტში" ხვალ, ქმრის მხრიდან ცოლზე ძალადობასთან დაკავშირებით ჩატარებული კვლევის პრეზენტაცია გაიმართება. კვლევას საზოგადოებრივი პოლიტიკის ინსტიტუტი და გაერო-ს ქალთა ორგანიზაცია წარადგენენ.
კვლევის მიხედვით, რესპონდენტთა 34,6% მიიჩნევს, რომ ცოლის ცემა გამართლებულია, თუკი ის შვილებს ყურადღებას არ აქცევს, ქმარს ეჩხუბება, საჭმელს წვავს, უარს ამბობს ინტიმურ კავშირზე ან ნებართვის გარეშე გადის სახლიდან.
ამავე კვლევის მიხედვით, ქმრის მიერ ცოლის ცემა დანაშაულად რესპონდენტთა 69%-ს მიაჩნია, 25% კი თვლის, რომ ის მხოლოდ ოჯახის საქმეა.
რაც შეეხება ქალის რეაქციას ძალადობაზე, გამოკითხულთა ასევე 69% მიიჩნევს, რომ ასეთ შემთხვევაში ის ქმარს უნდა დასცილდეს, 17% კი თვლის, რომ ცოლმა ძალადობა უნდა მოითმინოს.
ძალადობის შემთხვევაში პოლიციისთვის მიმართვას მეგობარს მხოლოდ გამოკითხულთა ნახევარზე ოდნავ მეტი ურჩევდა. პოლიციისადმი არმიმართვის ძირითადი მიზეზები სირცხვილი, საზოგადოების მხრიდან გაკიცხვის შიში და დაუცველობის გრძნობა - ქმრისგან კიდევ უფრო დიდი ძალადობის მოლოდინია.
გამოკითხულთა 77,8 %-ს ოჯახში ძალადობა ძალიან ან საკმაოდ ხშირ მოვლენად მიაჩნია, 9,6%-ს კი აქვს შიში, რომ ძალადობის მსხვერპლი შესაძლოა მისი ახლობელი ადამიანი გახდეს.
ქალთა მიმართ ძალადობისა და ოჯახში ძალადობის შესახებ საზოგადოებრივი ცნობიერებისა და დამოკიდებულებების კვლევა საზოგადოებრივი პოლიტიკის ინსტიტუტმა გაერო-ს ქალთა ორგანიზაციის დაკვეთით მიმდინარე წლის აგვისტო-სექტემბერში თბილისში, სამეგრელო-ზემო სვანეთსა და კახეთში ჩაატარა.
სულ 18-დან 60 წლამდე ასაკის 1500 რესპონდენტი გამოიკითხა. მათ შორის, 65.1% - ქალი და 34.9% - მამაკაცი.
კვლევა გაეროს ერთობლივი პროგრამის "გენდერული თანასწორობის ხელშეწყობისათვის საქართველოში" ფარგლებში ჩატარდა.
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
