როგორც "ინტერპრესნიუსს" გარემოს ეროვნული სააგენტოს მონიტორინგისა და პროგნოზირების ცენტრის თანამშრომელმა სვეტლანა ნიორაძემ განუცხადა, აღმოსავლეთ საქართველოში წუხელ, ღამით ყინვა დაფიქსირდა, ჰაერის ტემპერატურის მცირედით დათბობასთან ერთად, თოვა სავარაუდოდ, დღეს 14.00-15.00 საათის შემდეგ დაიწყება. მათ შორის თბილისშიც.
აღმოსავლეთ საქართველოში 13 დეკემბრის დილამდე ითოვებს.
ამასთან, დღეს დასავლეთ საქართველოში თოვა ყველგან შეწყდა.
სინოპტიკოსები 14 დეკემბრის ღამით ძლიერ ყინვებს პროგნოზირებენ. დასავლეთ საქართველოს ბარში ღამით ყინვა -7 გრადუსი; მაღალმთაში -22, აღმოსავლეთ საქართველოს ბარში -12, მაღალმთაში -20 გრადუსი იქნება, თბილისში - 6.
14-15 დეკემბერს, დასავლეთ და აღმოსავლეთ საქართველოს მაღალმთაში ქარბუქია მოსალოდნელი.
სვეტლანა ნიორაძის განმარტებით, 14 დეკემბრის ბოლოს დასავლეთ საქართველოში ამინდი ისევ გაუარესდება. უმეტეს რაიონებში თოვა და თოვლჭყაპი იქნება. ასევე ითოვებს აღმოსავლეთ საქართველოს დასავლეთ ნაწილში.
სინოპტიკოსების პროგნოზით, საქართველოში 16 დეკემბრიდან რამდენიმე დღით გამოიდარებს და შედარებით დათბება.