8 იანვარს სინოპტიკოსები თოვას ვარაუდობენ

8 იანვარს საქართველოში თოვლია მოსალოდნელი. როგორც "ინტერპრესნიუსს" გარემოს დაცვისა და ბუნებრივი რესურსების სამინისტროდან აცნობეს, 7 იანვრის დღის ბოლოდან საქართველოში შავი ზღვის ჩრდილო-დასავლეთიდან მოსალოდნელია ცივი და ნოტიო ჰაერის მასების გავრცელება, რაც 8 იანვრის დღის მეორე ნახევრამდე დასავლეთ საქართველოს უმეტეს ნაწილში ნალექს გამოიწვევს - ზღვის სანაპირო ზოლში წვიმის, კოლხეთის დაბლობზე უპირატესად თოვლჭყაპის, მთასა და მაღალ მთაში თოვლის სახით.

სვანეთისა და აჭარის მთიან რეგიონებში, აგრეთვე რიკოთის გადასასვლელზე შესაძლებელია დროგამოშვებით ძლიერი, ხოლო აღმოსავლეთ საქართველოს ცალკეულ რაიონებში საშუალო ინტენსივობის თოვლი აღინიშნოს.

8 იანვრის დღის მეორე ნახევრიდან 11 იანვრის დღის ბოლომდე საქართველოს მთელ ტერიტორიაზე გამოიდარებს.

"ინტერპრესნიუსი"