ფილიპ ლეფორი - სამხრეთ ოსეთის, როგორც დამოუკიდებელი სახელმწიფოს, სტატუსი დიდი ხანია განსაზღვრულია

ჟენევის მოლაპარაკებების თანათავმჯდომარე ევროკავშირის მხრიდან, ფილიპ ლეფორი ცხინვალში სამხრეთ ოსეთის ე.წ. პრეზიდენტს, ლეონიდ თიბილოვს შეხვდა. როგორც ოსური მედია წერს, შეხვედრისას თიბილოვმა ხაზგასმით აღნიშნა, რომ ჟენევის დისკუსიაზე მთავარი მიზანია ძალის გამოუყენებლობის შესახებ იურიდიული დოკუმენტის გაფორმება.

"ჩვენ ვიმედოვნებთ, რომ ამ საკითხის განხილვა დისკუსიების მომდევნო რაუნდზე უფრო პროდუქტიული იქნება", - განაცხადა თიბილოვმა.

თავის მხრივ ფილიპ ლეფორმა აღნიშნა, რომ ჟენევის დისკუსიებზე უსაფრთხოების და სტაბილურობის საკითხის განხილვა პირველ ადგილზე დგას.

"ომის რისკი გამორიცხული უნდა იყოს. იმისათვის, რომ ამის გარანტიები მივიღოთ, როგორც ოსური მხარე, ასევე ჩვენ დიდ ძალისხმევას ვდებთ ჟენევის დისკუსიებზე", - აღნიშნა ლეფორმა.

ამასთან, როგორც ოსური მედია წერს, ფილიპ ლეფორმა აღნიშნა, რომ სამხრეთ ოსეთის სტატუსი, როგორც დამოუკიდებელი სახელმწიფოს სტატუსი, რესპუბლიკის ხალხის მიერ დიდი ხანია, განსაზღვრულია. "ამ პოზიციის შეცვლა პრაქტიკულად შეუძლებელია. ეს რეალობაა, რომელთან ერთად ცხოვრება და მუშაობა უნდა ვისწავლოთ", - დასძინა ლეფორმა.

"ინტერპრესნიუსი"