31 იანვარს თბილისში მოთოვს

31 იანვარს თბილისში თოვლია მოსალოდნელი. როგორც "ინტერპრესნიუსს" გარემოს ეროვნული სააგენტოს მონიტორინგისა და პროგნოზირების ცენტრში განუცხადეს, საქართველოში არამდგრადი ამინდი თვის ბოლომდე შენარჩუნდება.

სინოპტიკოსების ინფორმაციით, 30 იანვრიდან აღმოსავლეთ საქართველოში მოსალოდნელია ნალექი, უმეტესად თოვლის სახით, დასავლეთში კი წვიმა. ტემპერატურა დასავლეთ საქართველოში 28 - 29 იანვარს +10 +15 გრადუსი იქნება, აღმოსავლეთ საქართველოში +6 +11.

რაც შეეხება დედაქალაქს, სინოპტიკოსების ინფორმაციით, 29 იანვარს, თბილისში ტემპერატურა +11 გრადუსი იქნება, 30 იანვარს თოვლჭყაპია მოსალოდნელი, დღის მაქსიმალური ტემპერატურა +4 გრადუსს შეადგენს. 31 იანვარს კი სინოპტიკოსები დედაქალაქში თოვლის მოსვლას პროგნოზირებენ.

"ინტერპრესნიუსი"