ხელვაჩაურში ხანძრის ლოკალიზება გვიან ღამით მოხერხდა

ხელვაჩაურის მუნიციპალიტეტის სოფელ სატეხიაში მაშველები და მეხანძრეები ცეცხლს დილის 04:00 საათამდე აქრობდნენ. ხანძრის ლიკვიდაციას ძლიერი ქარი აფერხებდა. ხანძარი სამ ჰექტრამდე ტერიტორიას, ჩაის პლანტაციებსა და ტყის მასივს გაუჩნდა.

როგორც "ინტერპრესნიუსს" აჭარის საგანგებო და გადაუდებელი სიტუაციების მართვის სააგენტოს უფროსის მოვალეობის შემსრულებელმა მამუკა თურმანიძემ განუცხადა, ხანძრის გაჩენის მიზეზი შესაძლოა, დივერსია იყოს. მისივე თქმით, გამოძიება დაიწყება და გაირკვევა ხანძრის გაჩენის მიზეზი.

"სამაშველო სამსახურის მორიგე ჯგუფები, სახანძრო სამსახური და შსს სამაშველო სამსახურმა ნიჩბებით ჩააქრეს ხანძარი. შეშის დამზადების პროცესი დასრულებულია, სასოფლო-სამეურნეო სამუშაოები ჯერ არ დაწყებულა, ამიტომ, შესაძლოა, გამიზნულ ქმედებებთან და დივერსიასთან გვქონდეს საქმე. გამოძიება დაიწყება და გაირკვევა ხანძრის გაჩენის მიზეზები", - აღნიშნა მამუკა თურმანიძემ.

მისივე თქმით, ხანძარი სამ ჰექტრამდე ტერიტორიას, ჩაის პლანტაციებს და ნაწილობრივ ტყის მასივს მოეკიდა. მამუკა თურმანიძის თქმით, იყო საშიშროება, ხანძრის სახლებამდე მისვლის, თუმცა სამაშველო ჯგუფების დროული ქმედებების შედეგად მოსახლეობა არ დაზარალებულა.

"ინტერპრესნიუსი"