ყაზბეგის გამზირზე ექსპერტ-კრიმინალისტები მუშაობენ

ყაზბეგის გამზირზე ლომბარდში, სადაც სპეცოპერაცია ჩატარდა, ექსპერტ-კრიმინალისტები შევიდნენ. როგორც "ინტერპრესნიუსის" კორესპონდენტი შემთხვევის ადგილიდან იუწყება, შენობაში იმყოფებიან სასწრაფო დახმარების ექიმებიც, რომლებიც კომენტარს არ აკეთებენ.

ტერიტორია ისევ შემოსაზღვრულია და უცხო პირებს მიახლოების საშუალებას არ აძლევენ. მოკლულის ცხედარი შენობიდან ჯერ არ გამოუსვენებიათ. ჯერ ისევ შენობაში ჰყავთ სამართალდამცავებს სპეცოპერაციის შედეგად დაკავებული ეროვნებით ჩინელი საქართველოს მოქალაქე, რომელმაც თანამშრომელი სავარაუდოდ, გუშინ მოკლა.

შს სამინისტროს ინფორმაციით, გამოძიებამ დაადგინა, რომ დაკავებულს, მიმდინარე წლის 4 თებერვალს, შუადღეს, თბილისში, ყაზბეგის გამზირზე მის მიერ ნაქირავებ ვალუტის გადამცლელ პუნქტში, გვერდით მდებარე სავალუტო ჯიხურის მეპატრონე 1958 წელს დაბადებულ გენადი ლომიძესთან თანხასთან დაკავშირებით ურთიერთშელაპარაკება მოუვიდა, რის შემდეგაც ცეცხლსასროლი იარაღიდან გულმკერდის არეში სასიკვდილო ჭრილობა მიაყენა. გენადი ლომიძე მძიმე ჭრილობის შედეგად ადგილზე გარდაიცვალა.

ბრალდებული ჯიხურში ჩაიკეტა და თვითმკვლელობით იმუქრებოდა. შემთხვევის ადგილზე გამოცხადებულმა სამართალდამცველებმა 15-საათიანი მოლაპარაკების შემდეგ ბრალდებულის განიარაღება შეძლეს და ადგილზე დააკავეს.

გამოძიება განზრახ მკვლელობის ფაქტზე მიმდინარეობს (სსსკ-ის 108-ე მუხლით).

"ინტერპრესნიუსი"