კულინარული ნიჩაბი, რომლის გამოყენება საშიშია ჯანმრთელობისთვის

სურსათის ეროვნული სააგენტო აფრთხილებს მოსახლეობას, არ გამოიყენოს ფირმა ALJUAN S.L. -ის მიერ წარმოებული სამზარეულოს დამხმარე ე.წ. კულინარული ნიჩაბი. როგორც სურსათის ეროვნული სააგენტოს მიერ გავრცელებულ განცხადებაშია ნათქვამი, სააგენტოში ჯანმრთელობისა და მომხმარებელთა დაცვის გენერალური დირექტორატის (DG SANCO) ევროპის კომისიის RASFF-ის სწრაფი საგანგაშო შეტყობინების სისტემით, შევიდა ინფორმაცია, რომლის თანახმადაც, ესპანეთში, ფირმა ALJUAN S.L.- ის მიერ წარმოებული სამზარეულოს დამხმარე ე.წ. კულინარული ნიჩბიდან ფიქსირდება (ფერადი) არომატული ამინების მიგრაციის ფაქტი. სურსათთან შეხებისას აღიშნული ნივთიერების შემცველი ნივთის გამოყენება არ არის რეკომენდირებული ადამიანის ჯანმრთელობისთვის.

სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსის მე-10 და 22-ე მუხლების თანახმად, სურსათის ეროვნული სააგენტო აფრთხილებს მოსახლეობას, არ გამოიყენოს ე.წ. სამზარეულოს აღნიშნული კულინარული ნიჩაბი.

"სააგენტოში შემოსული შეტყობინების თანახმად, საქართველოში სულ შემოვიდა 48 ცალი სამი ფერის ნიჩაბი (Artikel #45459). მისი შემომტანია შ.პ.ს. "ევრო პლიუსი". კომპანიის დირექტორის, დავით კვინიხიძის თქმით, აღნიშნული ნივთები თბილისში პეკინის #27-სა და ჭავჭავაძის #22-ში მდებარე მაღაზია "ჩიბოს", ქსელში გაიყიდა. სააგენტო კიდევ ერთხელ მოუწოდებს მოსახლეობას, ყურადღებით გაეცნონ ინფორმაციას და არ გამოიყენონ ე.წ სამზარეულოს კულინარული ნიჩაბი სურსათის მომზადების დროს", - ნათქვამია განცხადებაში.

"ინტერპრესნიუსი"