"თქვენი მტერი და ორგული
ციებამ დააღონაო,
მე ამას ვერ გადვურჩები,
თუ კიდევ მომიგონაო,
დამადნო სანთელივითა,
გამხადა დრამის წონაო,
ამ წყეულს რასა შევყვარდი,
ჩემში რა მოიწონაო"
- ეს სტრიქონები XVIII საუკუნეში მცხოვრებ პოეტ ქალს, მანანას, ეკუთვნის. მანანას ცხოვრების შესახებ ბევრი არაფერი ვიცით, მხოლოდ მისი სახელია შემორჩენილი. კრიტიკოსების აზრით, ძველ საქართველოში მოღვაწე პოეტ ქალთა შორის მანანა ყველაზე გამორჩეულია. ცნობილია, რომ ის წარმოშობით ქართლიდან იყო: დაიბადა სოფელ ძევერაში, გორის მახლობლად. პოეტური მემკვიდრეობიდან ჩანს, რომ მანანა ერეკლე მეორის თანამედროვე და იმ დროში საკმაოდ პოპულარული ადამიანი ყოფილა. ჩვენამდე მოღწეულია მისი რამდენიმე ლექსი, რომელიც ხანდაზმულობაში შეუთხზავს. რელიგიურ-მისტიკური განწყობილება მანანას პოეზიის დამახასიათებელი შტრიხია. მის შემოქმედებაში გამოყოფენ ლექსს, რომელსაც "შაირნი" ჰქვია და ერეკლე II-ის სამხედრო ძლიერებას, მის პიროვნულ ღირსებებს ეძღვნება. მისი ლექსები დაწერილია რუსთველური, 16-მარცვლიანი შაირით. უშუალობა, მსუბუქი იუმორი და პოეტური ხერხების მრავალფეროვნება ნიჭიერ ავტორზე მიგვითითებს, რომელსაც, სავარაუდოდ, უფრო მრავალფეროვანი და საინტერესო შემოქმედება უნდა ჰქონოდა. სამწუხაროდ, ამ შემოქმედებამ ჩვენამდე ისევე ვერ მოაღწია, როგორც პოეტი ქალის ცხოვრების იდუმალმა და უცნობმა დეტალებმა.
(გამოდის ოთხშაბათობით)