"მხედრიონი" უკრაინაში იომებს - "სისხლით ვალში ვართ უკრაინელებთან"

უკრაინაში მშვიდობა ძალიან მყიფეა. ერთ გასროლას შესაძლოა, მოვლენათა ესკალაცია მოჰყვეს. ქართული საზოგადოების დიდი ნაწილი უკრაინელ ხალხს სოლიდარობას უცხადებს - ჩვენ არ გვესწავლება, რა მწარეა ტერიტორიების დაკარგვა და ოკუპაცია. საქართველოში არიან ისეთებიც, რომლებიც მზად არიან, უკრაინა-რუსეთის ომის დაწყების შემთხვევაში, იარაღით ხელში იბრძოლონ უკრაინელების მხარეს. ერთ-ერთი მათგანია "მხედრიონელი", ვეტერანთა უფლებების დაცვის ასოციაციის დამფუძნებელი, დოდო გუგეშაშვილი.

- რუსეთმა უკრაინას ჩამოაჭრა ყირიმი, ისე როგორც ჩვენ ჩამოგვაჭრა ცხინვალი და აფხაზეთი. სხვათა შორის, აფხაზეთის ომში საკუთარი ნებით ჩამოვიდნენ უკრაინელი ბიჭები და ჩვენთან ერთად იბრძოდნენ - იმ ომში 14 უკრაინელი დაიღუპა. სისხლით ვალში ვართ უკრაინასთან, ამიტომ გვერდით უნდა დავუდგეთ ჩვენს ძმებს. ამ ადამიანებმა იციან, რომ რუსეთის იმპერია მსოფლიო უბედურებაა. როცა აფხაზეთში ჩვენს მხარდამხარ იბრძოდნენ, უკრაინელების დევიზი იყო - თუ რუსეთს არ გავაჩერებთ ფსოუზე, მისი გაჩერება მოგვიწევს დნეპრზეო . ეს დრო დადგა, რუსეთი უნდა შევაჩეროთ, გვერდით უნდა დავუდგეთ ჩვენს ძმებს.

- ანუ მზად ხართ, რომ უკრაინელებთან ერთად იომოთ?

- თუ უკრაინას დასჭირდება, აუცილებლად წავალთ "მხედრიონელები" მათ დასახმარებლად. უკრაინელი გმირები სისხლის ფასად შეეცდებიან პუტინის რეჟიმის შეჩერებას. ამის შემდეგ კეთილს ინებებს ამერიკა და ვეროპა და გვერდით დაუდგებიან უკრაინას.

თამარ ბოჭორიშვილი

Ambebi.ge