მიხეილ ძაძამია - კონსპირაციული ბინის არსებობა იყო ზურაბ ჟვანიას, მისი დაცვის უფროსის და ჩემი საიდუმლო

კონსპირაციული ბინის არსებობა იყო ზურაბ ჟვანიას, მისი დაცვის უფროსის და ჩემი საიდუმლო, - ამის შესახებ დღევანდელ სასამართლო პროცესზე ზურაბ ჟვანიას გარდაცვალების საქმეზე ბრალდებულმა მიხეილ ძაძამიამ განაცხადა.

მისი თქმით, მას მიჰყავდა ხოლმე ჟვანია იქ და თითოეული ამ გადაადგილების შესახებ ყოველთვის იცოდა დაცვის უფროსმა კობა ხარშილაძემ.

"ზურაბ ჟვანია მივიყვანე კონსპირაციულ ბინაში და ასეთი რამ ხშირად ხდებოდა ხოლმე. ამ ბინის შესახებ არავის უნდა სცოდნოდა, გარდა დაცვის უფროსისა და ჩვენი. ეს იყო საიდუმლო, ზურას მოთხოვნით. მე მართალი ვარ ამ საქმეში და მართალი ვარ ღმერთის წინაშე", - განახცადა ძაძამიამ.

საქალაქო სასამართლომ ძაძამიასა და სასამართლო-სამედიცინო ექსპერტ ლევან ჩაჩუას დღეს აღმკვეთი ღონისძიების სახით პატიმრობა შეუფარდა.

"ინტერპრესნიუსი"