"კულუარები" მთავარი პროკურატურიდან - ვის დაიბარებს გამოძიება დაკითხვაზე სააკაშვილის ოჯახის წევრებიდან?

როგორ განვითარდება მოვლენები, თუკი სააკაშვილი დაკითხვაზე არ გამოცხადდება? იურისტი და ადვოკატი გელა ნიკოლაიშვილი "ალიასთან" საუბრისას აცხადებს, რომ ნებისმიერ შემთხვევაში, მოწმის გამოუცხადებლობა არის სისხლის სამართლის დანაშაული.

როგორც "ალიას" პროკურატურიდან წყარომ განუცხადა, უწყებაში უკვე მუშაობენ სააკაშვილის მონაცემების ინტერპოლისთვის გადასაცემად, რადგან ექსპრეზიდენტი ჩამოსვლას არ აპირებს. "აუცილებლად ჩამოიყვანენ სააკაშვილს. იმდენად მძიმე საქმეებია და იმდენად გამყარებულია მტკიცებულებებით, რომ გამორიცხულია, არ მიათრიონ დაკითხვაზე. საქმეები დასკვნით ფაზაშია შესული და როგორ ფიქრობთ, პროკურატურა ამ საქმეებს გვერდით გადადებს მხოლოდ იმის გამო, რომ სააკაშვილს არ ნებავს გამოცხადება?" - ამბობს წყარო.

წყაროს ცნობით, სააკაშვილის მსგავსად უახლოეს მომავალში დაკითხვაზე გამოიძახებენ იუსტიციის ყოფილ მინისტრს ზურაბ ადეიშვილსაც. წყაროს თქმით, ადეიშვილის საქართველოში ჩამოყვანის მიზეზი "ქართუ ბანკის" გაკოტრების საქმე გახდება, რადგან ეს სქემა სწორედ ადეიშვილის კაბინეტში დაიგეგმა სააკაშვილთან შეთანხმებით. არ არის გამორიცხული, ადეიშვილს ბრალი წაუყენონ ასევე შესაწყალებელი პატიმრების უკანონო სიების შედგენაში, რომელსაც ის სააკაშვილთან შეთანხმებით ადგენდა, ეს უკანასკნელი კი მძიმე დანაშაულებებში ეჭვმიტანილ პირებს იწყალებდა".

როგორ განვითარდება მოვლენები, ამას დრო გვიჩვენებს, ფაქტია, რომ სააკაშვილის ოჯახსა და სანათესაოს კარგი დღე არ უდგათ. პროკურატურა თემურ ალასანიას უკანონო საქმეებითაც დაინტერესდა. საქმე ეხება მიხეილ სააკაშვილის მიერ თემურ ალასანიასთვის 5,5 ჰა მიწის დაბალ ფასში გადაცემის ფაქტს. შეგახსენებთ, რომ შპს "ბეზეკის" საქმე ერთ-ერთია, რომელთან დაკავშირებითაც ბადაშვილის უწყებას კითხვები სააკაშვილთან აქვს. "ბეზეკის" დირექტორი თემურ გაგნიძე ამბობს, რომ წისქვილკომბინატი "ბეზეკი" 2007 წლიდან მუშაობს. გაფართოების მიზნით განაცხადი ობიექტის გვერდით არსებულ არასასოფლო-სამეურნეო მიწაზე შეიტანეს, თუმცა, საბოლოო ჯამში, მისი დაკანონება სამი წლის შემდეგ შეძლეს. როგორც გაგნიძე აცხადებს, მიწის ფართობში ოთხმა მფლობელმა, რომელთა შორის, ერთ-ერთი თემურ ალასანიაა, 1 მილიონ 825 ათასი ლარი გადაიხადეს.

"ბეზეკის" საქმის პარალელურად, თემურ ალასანიას კუთვნილ ფირმა "ტავ ჯორჯიაში", რომლის წყალობითაც თავის დროზე პრეზიდენტის ბიძამ თბილისის საერთაშორისო აეროპორტი ჩაიგდო ხელში საერთაშორისო აუდიტორული ფირმა შევიდა. აუდიტორებმა უკვე განახორციელეს სამუშაოები, თუმცა საბოლოო დასკვნას ისინი სამ თვეში დადებენ. "ტავ ჯორჯიას" შესამოწმებლად აუდიტორული ფირმა სახელმწიფომ მოიწვია. რატომ გახდა საჭირო "ტავ ჯორჯიას" შემოწმება და რა ეჭვები არსებობს ალასანიას ფირმასთან დაკავშირებით? "ალიას" ესაუბრება საავიაციო სააგენტოს ხელმძღვანელი გურამ ჯალაღონია.

"ძალიან დიდი ხანია საუბარი მიდის, რომ "ტავ ჯორჯიაში" მთელ რიგ დარღვევებს ჰქონდა ადგილი, რომ ასაფრენ-დასაფრენი ზოლი არ არის უსაფრთხო და ა.შ. ამიტომ მოწვეულ იქნა საერთაშორისო აუდიტორული ფირმა, რომელიც ერთხელ და სამუდამოდ შეისწავლის არსებულ ვითარებას და დადებს დასკვნას, რა დარღვევაა კომპანიაში. აუდიტორული კომპანია შეისწავლის უსაფრთხოების ხარისხს, ასაფრენ-დასაფრენ ზოლს, სადგომ ადგილებს, განათებას, მგზავრთა ნაკადის მომსახურებას და ასევე, ვაგზალსაც. ამის შემდეგ ჩვენ გვექნება რეალური სურათი, რა მდგომარეობა გვაქვს ამ კუთხით".

დაინტერესდება თუ არა პროკურატურა თემურ ალასანიას საქმიანობით და გამოიძახებს დაკითხვაზე? იურისტი და ადვოკატი მამუკა ნოზაძე აცხადებს, რომ პროკურატურამ კითხვები თემურ ალასანიასაც უნდა დაუსვას, ვინაიდან როცა ჩნდება ეჭვი, რომ მიწა უკანონოდ გასხვისდა, მაშინ უკანონო შემძენიც დამნაშავეა.

რაც შეეხება სააკაშვილის დედას, გიული ალასანიას, მის წინააღმდეგ სისხლის სამართლის საქმეა აღძრული სახელმწიფო ქონების უკანონო დაუფლებასთან და კორუფციულ გარიგებასთან დაკავშირებით. "ქართული დასის" ლიდერი ჯონდი ბაღათურია წლებია, აქტიურად არის ჩართული გიული ალასანიას კორუფციული სქემის გაშიფვრაში. ბაღათურიამ საკმაო ხანია, მასალები გადასცა პროკურატურას. მოგვიანებით ბაღათურია შეხვდა საქმის გამომძიებელსაც, რომელმაც განუცხადა, რომ ძიება აქტიურ რეჟიმში მიმდინარეობს. ინფორმაცია გიული ალასანიას ბიზნესთან დაკავშირებით ჯონდი ბაღათურიამ შეკრიბა და დღეის მდგომარეობით ექსპრეზიდენტის დედის ქონება ასე გამოიყურება:

გიული ალასანიამ დააფუძნა "საქართველოს უნივერსიტეტი", რომლის 40%-ს თავად ფლობს, 37%-ს ფლობს გიული ალასანიას მეგობარი მანანა სანაძე, 12,5%-12,5% კი პრეზიდენტის ბიძაშვილს, ნიკოლოზ ალასანიასა და ედუარდ რობერტ რაუპს ეკუთვნით. ალასანია სულ 16 საგანმანათლებლო დაწესებულების მფლობელია.

როგორც ჩვენთვის არის ცნობილი, ბადაშვილის უწყება ამჟამად მთელი რესურსით მუშაობს, რომ მიიღოს კითხვებზე პასუხები სააკაშვილისა და ადეიშვილისგან. დაწყებულია მოსამზადებელი სამუშაო მათ სამშობლოში დასაბრუნებლად. მოგვიანებით კი და-ძმა გიული და თემურ ალასანიებისთვისაც მოიცლიან.

შორენა გოგოლაძე

გაზეთი "ალია"