როგორი იქნება ახალი წლის პირველი თვე მშვილდოსნებისთვის - იანვრის ასტროლოგიური პროგნოზი

გაგიუმჯობესდებათ მატერიალური მდგომარეობა და ამის გამო გულუხვი გახდებით საკუთარი თავისა და ახლობლების მიმართ. შეიძლება ფული მიიღოთ ადრე შესრულებული საქმისთვის. ფულთან ერთად კი დაფასება და აღიარებაც მოიპოვოთ. ზოგიერთ მშვილდოსანს სადღესასწაულო დღეების შემდეგ დააწინაურებენ. შეიძლება შემოსავლის დამატებითი წყაროც კი გამოგიჩნდეთ. თვის ბოლოსკენ მოიმატებს მეგობრული შეხვედრები, ქალაქგარეთ გასვლის სურვილი. ზოგიერთმა შეიძლება მეტი დრო გაატაროთ ვირტუალურ სამყაროში.

• სწავლა, ბიზნესი, კონტაქტები

მიმოსვლები გახშირდება საქმეების ან სწავლის გამო. შეიძლება სრულიად განსხვავებულ სფეროებში მოსინჯოთ საკუთარი ძალები. ყურადღება გმართებთ მიღებული ინფორმაციებისადმი, გადაუმოწმებლად ნურავის და ნურაფერს ენდობით. თუ სწავლობთ, ზედაპირულ ცოდნას ნუ დასჯერდებით, ეცადეთ, გაიღრმაოთ. თუ მოინდომებთ, უამრავ იდეას განახორციელებთ. დახმარებისთვის მიმართეთ და-ძმებს, მეგობრებს. ან შეიძლება მათ დასჭირდეთ თქვენი მიშველება.

• ფული და სიყვარული

კომფორტულად ცხოვრება მოგინდებათ, შეიძლება ძვირად ღირებული ან ლამაზი ნივთებიც კი შეიძინოთ. ფული საკმარისად გექნებათ, ამიტომ, საკუთარ თავს უარს ნურაფერზე ეტყვით. საახალწლოდ საყვარელი ადამიანი უყურადღებოდ არ დატოვოთ, ძვირფასი საჩუქარი მასაც მიუძღვენით. თუმცა, ბედნიერების შეგრძნება მხოლოდ მატერიალური სფერო არაა და ეცადეთ, იყოთ მოსიყვარულე, მზრუნველი.

• ჯანმრთელობა

მოერიდეთ დაპირისპირებას კოლეგებთან, საკუთარ თავზე ზედმეტი ვალდებულებების აღებას. მოსაფრთხილებლია ჯანმრთელობაც; იანვარში შეიძლება პერიოდულად სიცხემ აგიწიოთ. გაფრთხილდით, მომატებულია იარებისა და დამწვრობების ალბათობა. სამსახურშიც ფრთხილად იყავით, განსაკუთრებით, თუ თქვენი საქმიანობა ხიფათთანაა კავშირში.