ცოლ-ქმარი, რომელიც 63 წელი იყო ერთად, ერთ დღეს გარდაიცვალა

1951 წელს ბობ და ბარბარა პეტისებმა ფიცი დადეს, რომ ერთმანეთი მანამდე ეყვარებოდათ, ვიდრე სიკვდილი არ დააშორებდათ და ეს ფიცი მტკიცედ შეასრულეს.

82 წლის ბარბარა 30 ივნისის დილას გარდაიცვალა ოკლაჰომის მოხუცთა თავშესაფარში. ის ჯანმრთელობის პრობლემებს  მრავალი წელი უჩიოდა. 85 წლის ბობი, რომელიც საავადმყოფოში იწვა პნევმონიით დაავადებული, ცოლის გარდაცვალებიდან რამდენიმე საათის შემდეგ გარდაიცვალა.

ცოლ-ქმრის შვილს, კლეი პეტისს სულ არ აკვირვებს, რომ დედ-მამა ერთ დღეს გარდაიცვალნენ - ”მე დამთხვევების არ მჯერა, მე მამისთვის არ მითქვამს, რომ დედა გარდაიცვალა, მაგრამ დარწმუნებული ვარ, თავად იცოდა”.

ბობი და ბარბარა ორივე სკოლის მასწავლებლები იყვნენ. ”ისინი ჩვეულებრივი ცხოვრებით ცხოვრობდნენ, მაგრამ როდესაც ახლოს გაიცნობდი და დააკვირდებოდი, მიხვდებოდი, რომ ის, რაც ერთი შეხედვით ჩვეულებრივი გეგონა, ძალიანაც არაჩვეულებრივი ყოფილა”, - ამბობს მათი ვაჟი.

ნამდვილად ასეა. მათი 63 წლიანი ქორწინება მარტივი მიმანიშნებელია იმისა, თუ რამდენად უყვარდათ ერთმანეთი. ”ისინი ზედმეტად არ გამოხატავდნენ ემოციებს ხვევნა-კოცნით, მაგრამ მათ ხმაში და მზერაში იგრძნობოდა, თუ რამდენად უყვარდათ ერთმანეთი”, - განაცხადა კლეი პეტისმა.

ცოლ-ქმარს დარჩა სამი შვილი - კლეი, ლესლი ნილი და ჯიმ კოული, 11 შვილიშვილი და 5 შვილთაშვილი.