"უსმინეთ ჟურნალისტებს, ბატონო ბიძინა" - ცოტნე გამსახურდია ივანიშვილს რეპუტაციაზე ზრუნვას ურჩევს

საქართველოს ექსპრეზიდენტის ვაჟი და ყოფილი პოლიტპატიმარი ცოტნე გამსახურდია ყოფილ პრემიერ ბიძინა ივანიშვილს რჩევა-დარიგებებს აძლევს. გამსახურდია მამის გამოცდილებას იხსენებს და ივანიშვილს საკუთარ რეპუტაციაზე ზრუნვას ურჩევს.

"როგორც სჩანს, ბიძინა ივანიშვილი მართლაც უკმაყოფილოა შექმნილი ვითარებით და რეალურად აღელვებს საკუთარი რეპუტაცია. ეს კარგია. მართალია, გადაჭარბებული ყურადღება ხშირად უცენზურო და უსაფუძვლო კრიტიკისადმი ქართულ პოლიტიკაში დამღუპველია - როგორც ეს დაემართა მამაჩემს, მაგალითად, როცა მას სწორედ იმაში ადანაშაულებდნენ მიზანმიმართულად, რაც თავშიც არსდროს გაუვლია - ეს მაინც ბევრად სჯობს სიტუაციას, როცა ყველა და ყველაფერი ფეხებზე გკიდია და "ძაღლი ყეფს, ქარავანი კი მიდის". როცა შენი შენი ყოფილი ამომრჩეველი ქარავანისთვის მაყეფარი ძაღლის ფასია. ესეც იყო უკვე...

და მაინც, იგი ამ ხმას ვერც მატარებელში გაიგებს და ვერც - თვითმფრინავში. პირველად შეხვედრისას ვუთხარი სწორედ: ეს არის ქვეყანა, სადაც უსიამოვნო ამბის მომტანს თავს აჭრიდნენ. თქვენ არავინ, არასოდეს გეტყვით ცუდ ამბავსთქო. ეტყობოდა, რომ არ დამიჯერა. თუმც ფაქტი - ჯიუტია უნდა გვესმოდეს, რომ ადამიანის გამოკითხვისას დაინტერესებული პირის მიერ გარკვეული განუსაზღვრელობის პრინციპი მოქმედებს: როცა შენი ყოფნა გავლენას ახდენს მისი გონების მდგომარეობაზე და შედეგი უკვე აღარ იქნება "ბუნებრივი" - წერს გამსახურდია. მისი თქმით, ივანიშვილი მეტად უნდა უსმენდეს მასმედიას, რადგან სწორედ ეს უკანასკნელი გამოხატავს ყველაზე უკეთ ხალხის განწყობას.

"ვფიქრობ, აქ ბიძინა ივანიშვილის საუკეთესო დამხმარე ისევ მედია და ჟურნალისტები იქნებიან, ვისთანაც მან ურთიერთობის საკმაოდ უცნაური მანერა აირჩია. მედია ასახავს ხალხში არსებულ გუნება-განწყობებს და ამავ დროს - თავად აყალიბებს მათ. უსმინეთ ჟურნალისტებს, ბატონო ბიძინა: ხშირად გაუნათლებლებს, ზოგჯერ მოსყიდულებს თუ ანგაჟირებულებს, ხანდახან - მონდომებულებს, პატრიოტებს და პროფესიონალებს. ისინი ჩვენი ქვეყნის ტიპიური შვილები არიან. შესაბამისი პროპორციებით წარმოდგენილი", - წერს გამსახურდია სოციალურ ქსელში.