ზაზა ბიბილაშვილმა, საკუთარი "ფეისბუქის" გვერდზე, ირმა ინაშვილის ლექსი გამოაქვეყნა, რომელიც ჟურნალ "ცისკარში" იყო დაბეჭდილი:
"ნორჩი ირმა ინაშვილის ოდა კომკავშირს. ნუ, არაა მთლად სასიამოვნო წასაკითხი, მაგრამ, მე რომ მკითხო, მაინც არ გამოგდება კომპრომატად: 87 წელია. ვის გააკვირვებ კომკავშირზე ლექსებით და "სისხლით დაფერილი, სპეტაკი ოცნებებით"? ან იქნებ "შიგნიდან ანგრევდა" კომკავშირს? გავა კიდევ ორწელიწადნახევარი და 9-აპრილ-გამონავალი დავით უსუფაშვილი კომუნისტურ პარტიაში შევა... ვინ იტყვის, რომ დღეს ის ირმა ინაშვილზე ნაკლები პატრიოტია?! მთავარია, "სისხლიან რეჟიმს" ორივე "გარედან" ებრძოდა. განა ის 9 წელი საბჭოთა კავშირზე დიდი ბოროტება არ იყო? მაშინ "სულიერად ოკუპირებული" მაინც არ ვიყავით!" - წერს ბიბილაშვილი.
მოდის კომკავშირი!
წითელი მანდატი -
სისხლით დაფერილი,
სპეტაკი ოცნება -
მზისკენ გაფრენილი,
გმირული დღეები
ტყვიების მარულით,
მარად საფიცარი
სახელი - მამული!..
მოდის კომკავშირი -
ფოლადად ქცეული,
იმ გოგო-ბიჭების
სახელით ქებული,
ათასი სურვილით,
ათასი იმედით,
ცოცხალი ვარდებით,
ცოცხალი იებით...
სალამი, სალამი,
ფიქრებო ბორისის,
ეს მირზა გვეძახის-
მისი ხმა მოისმის...
თქვენია, თქვენია
სუყველა ღიმილი,
კვლავ გულზე გიბრწყინავთ
მზე ოქროს ღილივით!