10 წლის გოგონას გაუპატიურებასთან დაკავშირებით ახალი დეტალები გახდა ცნობილი - "ეჭვმიტანილი რამდენჯერმეა ნასამართლევი"

ზესტაფონის ერთ-ერთ სოფელში, სადაც, არსებული ინფორმაციით, 10 წლის გოგონა გააუპატიურეს, მომხდართან დაკავშირებით საუბარი უჭირთ.

როგორც "ინტერპრესნიუსს" სოფლის დეპუტატმა, ამირან ბახტიძემ განუცხადა, გაუპატიურების შესახებ ინფორმაცია 10 წლის ბავშვის ოჯახმა გაავრცელა. მისივე თქმით, მეზობლები საუბრობენ, რომ ბავშვს აღენიშნება სხულზე ნაკაწრები. თუმცა, დეპუტატის თქმით, სოფელში დაზუსტებით უჭირთ საუბარი მომხდარის შესახებ, ვიდრე არ იქნება ექსპერტიზის შედეგები. მისივე თქმით, 10 წლის გოგონა, ქუთაისშია გადაყვანილი და მას ექსპერტიზა უტარდება.

"ვიდრე ექსპერტიზის პასუხი არ იქნება, ჩვენ არანაირი უფლება არ გვაქვს, ვილაპარაკოთ გაუპატიურებაზე. ბავშვი ამჟამად ქუთაისში, ექსპერტიზის ბიუროში ყავთ მშობლებს წაყვანილი და ექსპერტიზა უტარდება. პასუხი სავარაუდოდ საღამოს იქნება", -განაცხადა ამირან ბახტიძემ. სოფლის დეპუტატის ინფორმაციით, გუშინ იმ პირსაც ესაუბრა, რომელსაც 10 წლის ბავშვის გაუპატიურებაზე სოფელი ეჭვობს. იგი მამაკაცი 43 წლისაა და რამდენჯერმეა ნასამართლევი.

"სავარაუდო ეჭვმიტანილი 43 წლის მამაკაცია. ადგილობრივი მაცხოვრებელია. რამდენჯერმეა ნასამართლევი. მეზობლები როგორც ყვებიან, ბოლოს ნარკოტიკებზე იყო დაკავებული და 3 თვის წინ დატოვა სასჯელაღსრულების დაწესებულება. გუშინ ჩვენ უბანში შევიკრიბეთ და ამ მამაკაცს მომხდარზე ვკითხეთ, თუმცა ამტკიცებს, რომ მსგავსი რამ არ მომხდარა, თუმცა დღეს როდესაც მოვიკითხეთ ეს პიროვნება, სოფელში აღარ არის", - განაცხადა ამირან ბახტიძემ.

დღეს გავრცელდა ინფორმაცია, რომ ზესტაფონის რაიონის ერთ-ერთ სოფელში 10 წლის გოგონა გააუპატიურეს. ინფორმაციას ამის შესახებ შინაგან საქმეთა სამინისტროშიც ადასტურებენ. როგორც "ინტერპერსნიუსს" სამინისტროში განუცხადეს, მომხდართან დაკავშირებით გამოძიება 137-ე მუხლის მეხუთე ნაწილით მიმდინარეობს, რაც გაუპატიურებას გულისხმობს.

"ინტერპრესნიუსი"

იხილეთ|ზესტაფონის ერთ-ერთ სოფელში 10 წლის ბავშვი გააუპატიურეს