"ეროსი კიწმარიშვილი ერთხელ მაინც გეხსენებინათ" - გიორგი ლაფერაშვილი

"რუსთავი 2"-ის საინფორმაციო სამსახურის ხელმძღვანელი გიორგი ლაფერაშვილი, სასტუმრო "რედისონში" ამჟამად მიმდინარე ქიბარ ხალვაშის, ჯარჯი აქიმიძისა და დავით დვალის სპეციალური ბრიფინგის შესახებ აკეთებს კომენტარს:

"მე არ ვარ "ძირძველი" რუსთავი ორელი. 2006 წლიდან ვმუშაობ აქ.

მე ის რუსთავი ორელი ვარ, ვისაც ის კაცი აკრიტიკებდა - თან მწარედ. და ვისთანაც, სიკვდილამდე ცოტა ხნით ადრე, ნიუსრუმში იდგა და სამომავლო გეგმებზე გულღიად საუბრობდა.

ჩემგან არა - თქვენგან მაინც ეკუთვნის ამ კაცს - თუნდაც ერთხელ ხსენება.

20 წუთია ლაპარაკობთ უკვე.

გამომრჩა?

ეროსი კიწმარიშვილი ერთხელ მაინც გეხსენებინათ - ისევ სათქვენოდ ვამბობ, თორემ იმას კი არაფერი -აღარაა ცოცხალი", - წერს ლაფერაშვილი

შეგახსენებთ, რომ თბილისის საქალაქო სასამართლომ გუშინ მიღებული განჩინებით, "რუსთავი 2"-ის დროებით მმართველად რეზო საყევარიშვილი დანიშნა, არხის აქამდე მოქმედ გენერალურ დირექტორ ნიკა გვარამიას კი უფლებამოსილება შეუწყდა. 3 ნოემბერს მოსამართლე თამაზ ურთმელიძემ "რუსთავი 2"-ის საქმეზე გადაწყვეტილება გამოაცხადა, რომლის მიხედვითაც ტელეკომპანიის წილები ქიბარ ხალვაშს დაუბრუნდა.