როგორ გამოიყურება მარკ ცუკერბერგის გარდერობი

"ფეისბუქის" დამფუძნებელმა მარკ ცუკერბერგმა სოციალურ ქსელში საკუთარ გვერდზე ფოტო განათავსა, რომელიც სამსახურში დაბრუნებას ეძღვნება, მას შემდეგ, რაც მარკმა და პრისცილამ დეკრეტული შვებულება დაასრულეს. შეგახსენებთ, წყვილს 2 თვის წინ პირველი ქალიშვილი - მაქსი შეეძინათ.

ფოტოზე მარკის გარდერობის ნაწილია ასახული: საკიდებზე 10 ერთი და იგივე მოდელის, რუხი ფერის მაისური და დაახლოებით ამდენივე მოლურჯო-რუხი ფერის სპორტული მოსაცმელი კიდია. ასეთია მსოფლიოში ყველაზე ახალგაზრდა მილიარდერის თითქმის ყოველდღიური ჩაცმულობა. მარკმა ფოტოს სახალისო წარწერა დაურთო: "სამსახურში პირველი დღე მაქვს დეკრეტული შვებულებიდან დაბრუნების შემდეგ. რა ჩავიცვა?"

ცუკერბერგის რიტორიკულ შეკითხვას ფეისბუქ-მომხმარებლების სახალისო კომენტარები მოჰყვა: "გრეის 50 ელფერი"; "მარცხნიდან მესამე კარგად გამოიყურება"; "ეს მარკია. მარკმა შექმნა ფეისბუქი. მარკმა არ იცის რა ჩაიცვას, ალბათ იმიტომ, რომ მის კარადაში ყველაფერი ერთნაირია. მარკს გადაწყვეტილების მიღება უჭირს. ნუ მიბაძავ მარკს", - წერენ სოციალური ქსელის მომხმარებლები ფოტოს კომენტარებში.