პინგვინები, აქლემი და კენგურუ - თბილისის ზოოპარკს მალე ახალი ბინადრები ეყოლება

თბილისის ზოოპარკს მალე ახალი ბინადრები ეყოლება. სხვადასხვა ქვეყნების ზოოპარკების მიერ საჩუქრად გადმოცემულ ცხოველებს დედაქალაქის ზოოპარკი გაზაფხულის ბოლოს მიიღებს.

როგორც AMBEBI.GE-ს თბილისის ზოოპარკის საზოგადოებასთან ურთიერთობის სამსახურის უფროსმა მზია შარაშიძემ განუცხადა, გაზაფხულის ბოლოს ჩამოიყვანენ 24 პინგვინს, რომლებიც ბრისტოლის ზოოპარკმა უკვე აჩუქა თბილისის ზოოპარკს, თუმცა მათი ჩამოყვანა ჯერ ვერ ხერხდება. რაც შეეხება პინგვინებს, რომლებიც წყალდიდობის შემდეგ სხვადასხვა ადგილებში იპოვეს და ვოლიერებში დააბინავეს, ყველა მათგანი დაიღუპა. ამასთან, წლების შემდეგ პირველად, თბილისის ზოოპარკის სტუმრები აქლემის ნახვასაც შეძლებენ. ვილი რიგიდან თბილისში მალე გამოემგზავრება.

"რიგის ზოოპარკმა გვაჩუქა ცხოველები, კერძოდ, მარტის ბოლომდე ველოდებით ორ თუთიყუშს (ჩაბულისი და ფილიპინა), აქლემს და რამდენიმე ლამას. ველოდებით ასევე მაიმუნებს, რომელთა ვოლიერების მშენებლობა სრულდება. გარდა ამისა, სამომავლოდ ველოდებით კენგურუებს. მიდის მოლაპარაკება ვეფხვებთან დაკავშირებით, უბრალოდ ჯერ არ შეგვირჩევია, რომელს წამოვიყვანთ", - გვითხრა მზია შარაშიძემ. მისივე ინფორმაციით, ზოგადად, ევროპის ზოოპარკებში მიღებული პრაქტიკაა ცხოველების გაცვლა, თუმცა თბილისის ზოოპარკი ამჯერად ყველა მათგანს საჩუქრად მიიღებს.

შარაშიძის განცხადებით, რიგის ზოოპარკმა არა მხოლოდ ცხოველებით დაასაჩუქრა თბილისის ზოოპარკი, არამედ რიგის დუმამ მათი ტრანსპორტირებისთვის 15 ათასი ევრო გამოყო.

თბილისის 13 ივნისის სტიქიის შედეგად, ზოოპარკის ტერიტორიის დიდი ნაწილი განადგურდა, აღარ არსებობს ვოლიერები, ზოოპარკის 600-მდე ბინადარიდან კი ნახევარზე მეტი დაიღუპა.

ინგა მურუსიძე

AMBEBI.GE