გურჯაანის გამგეობას სპორტკომპლექსის მშენებელი კომპანიისთვის 350 000 ლარის გადახდა დაეკისრა
უზენაესმა სასამართლომ გურჯაანის მუნიციპალიტეტის გამგეობას, გურჯაანის სპორტკომპლექსის მშენებელი კომპანია "თემა"-სთვის დაახლოებით 350 000 ლარის გადახდა დააკისრა. კომპანიის ადვოკატის თქმით, გამგეობამ "თემა"-ს ტენდერით გათვალისწინებულზე მეტი ღირებულების სამუშაოები შეასრულებინა. კომპანია შესრულებული სამუშაოების ღირებულების ანაზღაურებას ითხოვდა.
გურჯაანის მუნიციპალიტეტის გამგეობის იურიდიული სამსახურის უფროსის, ნანა ჭაბუკაძის თქმით, შპს "თემა"-ს მოთხოვნა დაახლოებით 1 600 000 ლარის გადახდა იყო. სასამართლომ გამგეობას 350 000-მდე ლარის გადახდა დააკისრა, საიდანაც დაახლოებით 251 000 ლარი სახელშეკრულებო თანხაა, 89 000 ლარზე მეტი კი პირგასამტეხლო.
შპს "თემას" ადვოკატის თამაზ კილანავას თქმით, გურჯაანის სპორტკომპლექსის პროექტის განსახორციელებლად, ტენდერით 2 800 000 ლარი იყო გათვალისწინებული, კომპანიამ კი 3 მილიონ ლარზე მეტი ღირებულების სამუშაო შეასრულა, რადგან პროექტით გათვალისწინებული რეაბილიტაციის ნაცვლად, არსებული შენობის დანგრევა და ახლის აშენება მოუხდა.
იმერეთის გუბერნატორის ხელფასი გაორმაგდა
ორი ობლისა და ორი ბებიას შემზარავი გასაჭირი გურიაში
