ბათუმის ხანძრის გმირი : "ის რომ არა, მსხვერპლის რაოდენობა უფრო დიდი იქნებოდა"

სოციალურ ქსელებში ვრცელდება ინფორმაცია ახალგაზრდა მამაკაცის შესახებ, რომელმაც "ლეონგრადში" გაჩენილი ხანძრისას ბევრი ადამიანი გადაარჩინა.

"იცნობდეთ რუსლან შავაძეს, ეს არის ადამიანი, რომელმაც ლეოგრანდში ხანძრისას მოქალაქეები გადაარჩინა...

მან პანიკაში მყოფი ადამიანები გარეთ გამოიყვანა, რომ არა ის, მსხვერპლის რაოდენობა უფრო დიდი იქნებოდა," - წერია პოსტში, რომელიც "ფეისბუქზე" განთავსდა.

ბათუმში, სასტუმრო "ლეოგრანდში" ხანძარი გუშინ, დაახლოებით 20.00 საათზე გაჩნდა. ძლიერი დაკვამლიანების გამო სასტუმროდან მოქალაქეების ევაკუაცია განხორციელდა.

ოფიციალური ინფორმაციით, ხანძრის შედეგად 11 ადამიანია დაღუპული, რომელთაგან 10 საქართველოს და 1 ირანის რესპუბლიკის მოქალაქეა, ჰოსპიტალიზაცია 21 ადამიანს დასჭირდა.

მომხდარ ფაქტთან დაკავშირებით, გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა ან სხვა მძიმე შედეგი გამოიწვია.