პიჯაკიანი დაცვის წევრები კიმ ჩენ ინის ლიმუზინთან ერთად გარბიან - კადრებმა სოციალური ქსელები გაამხიარულა

კადრებს, სადაც ჩანს, როგორ დასდევს პიჯაკებში გამოწყობილი დაცვის 12 წევრი კიმ ჩენ ინის მანქანას, სოციალურ ქსელებში მთელი დღეა, აქტიურად აზიარებენ. კადრები მაშინ გადაიღეს, როდესაც კიმმა სამხრეთ კორეის ლიდერთან შეხვედრა დაასრულა და სადილზე გაემგზავრა.

დაცვის წევრები მის შავ ლიმუზინთან ერთად გარბიან. სადილისთვის კიმ ჩენ ინი ჩრდილო კორეაში დაბრუნდა.

კადრები 90 წუთიანია, თუმცა უცნობია, რა მანძილი გაირბინეს დაცვის წევრებმა დიქტატორთან ერთად.

ნახეთ ვიდეო : ავტომობილში მჯდომ კიმ ჩენ ინს დაცვა სირბილით მიყვება

ისტორიული შეხვედრა ორი კორეის ლიდერებს შორის დღეს დაიწყო. ერთობლივ დეკლარაციაში, რომელსაც დღეს ჩრდილოეთ კორეასა და სამხრეთ კორეას ლიდერებმა მოაწერეს ხელი ნათქვამია, რომ სამხრეთ კორეა და ჩრდილოეთ კორეა ერთმანეთთან მიმართებაში მტრულ ქმედებებს შეწყვეტენ.

კიმ ჩენ ინი და მუნ ჩჟე ინმა შეთანხმებას მიაღწიეს, რომ აქტიურ დიალოგს განაგრძობენ მაღალ დონეზე. ასევე, სამხრეთ და ჩრდილოეთ კორეის სამხედროები შეთანხმდნენ მუდმივად კონტაქტზე იყვნენ ერთმანეთთან, მათ შორის თავდაცვის მინისტრების დონეზე. ასევე შეიქმნება ოპერატიული კავშირგაბმულობის ერთობლივი ცენტრი.

დეკლარაციის თანახმად, მხარეები ჰუმანიტარულ სფეროში თანამშრომლობაზეც შეთანხმდნენ, მათ შორის ოჯახების გაერთიანებაზე.

აღსანიშნავია, რომ სამხრეთ კორეის პრეზიდენტი მიმდინარე წლის შემოდგომაზე ვიზიტით ფხენიანს ეწვევა.

დღეს ფხანმუნჯის სასაზღვრო პუნქტზე ჩრდილოეთ კორეის ლიდერ კიმ ჩენ ინსა და სამხრეთ კორეის პრეზიდენტ მუნ ჩჟე ინს შორის ისტორიული შეხვედრა გაიმართა. სადემარკაციო ხაზზე ორი ქვეყნის ლიდერმა ერთმანეთს ხელი ჩამოართვეს. კიმ ჩენ ინი ჩრდილოეთ კორეის პირველი ლიდერი გახდა, რომელიც 1953 წლიდან სამხრეთ კორეას ეწვია.