ქალაქი, რომელიც ნაგავმა დაფარა - დელიში ბავშვები პლასტმასის გორებზე თამაშობენ

პლასტმასის ბოთლები, ცელოფნის პარკები, საკვების ნარჩენები, ნაგავი და სიბინძურე - „დეილი მეილი“ ნიუ-დელის ერთ-ერთი ღარიბი დასახლების, ტაიმურ ნაგარის ფოტოებს აქვეყნებს.

ნაგავში მაწანწალა ძაღლები, თხები და ძროხები დადიან. პლასტმასის ბოთლებში იქექებიან ბავშვებიც. მაშინ, როდესაც მსოფლიოს ბევრი ქვეყანა ცდილობს, პლასტმასის წარმოება მინიმუმამდე შეზღუდონ, ინდოეთში პლასტიკატის ნაგვის მთები დგას.

ტაიმურ ნაგარი არ არის ერთადერთი ადგილი დელიში, სადაც ყველაფერი ნაგავმა დაფარა, პრობლემა მთელი ქვეყნისთვის ძალიან მწვავედ დგას.

ინდოეთი გეგმავს, დაასუფთავოს პლაჟები, მოაწყოს მწვანე ტექნოლოგიის გამოფენები და სახელოვნებო ინსტალაციები, თუმცა ტაიმურ ნაგარი მკვეთრად უსვამს ხაზს, როგორი გამოწვევების წინაშე დგას ქვეყანა.

ინდოეთში ყოველწლიურად 5.6 მილიონი ტონა პლასტმასის ნაგავი რჩება. დელიში კი პლასტმასის მოხმარების ერთ-ერთი ყველაზე მაღალი მაჩვენებელია.