ავტორი:

"ეს მგონი მხოლოდ ივანიშვილმა იცის..." - სავარაუდოდ, რომელი მინისტრები დატოვებენ პოსტს?

"ეს მგონი მხოლოდ ივანიშვილმა იცის..." - სავარაუდოდ, რომელი მინისტრები დატოვებენ პოსტს?

ყოფილი პრემიერ-მინისტრის ბიძინა ივანიშვილის პოლიტიკაში „მეორედ მოსვლის“ შემდეგ, მთავრობაში პირველი საკადრო ცვლილებების განხორციელებას ელიან. კულუარული ინფორმაციით, ცვლილებები პირველ რიგში, მოქმედ პრემიერს გიორგი კვირიკაშვილს შეეხება და მას შს მინისტრი გიორგი გახარია ჩაანაცვლებს.

შესაძლოა, ცვლილებები კვირიკაშვილთან ერთად, იუსტიციის მინისტრ თეა წულუკიანსაც შეეხოს, რომლის მიმართ საზოგადოებაში და არასამთავრობო სექტორში ბოლო დროს საპროტესტო ტალღა აგორდა. მინისტრის პოსტებს სავარაუდოდ, დაემშვიდობებიან ეკონომიკის მინისტრი დიმიტრი ქუმსიშვილი, საგარეო საქმეთა მინისტრი მიხეილ ჯანელიძე და კულტურის მინისტრი მიხეილ გიორგაძე.

ამ წუთებში „ქართული ოცნების“ უმრავლესობის სხდომისთვის ემზადებიან, რომელზეც სავარაუდოდ, სწორედ სამთავრობო ცვლილებებზე ისაუბრებენ. დეპუტატების ინფორმაციით კი, უმრავლესობის შეხვედრა უკავშირდება მიმდინარე საკითხებს, მათ შორის, საუბარი შეეხება ბოლო პერიოდში განვითარებულ პროცესებს.

დაანონსებული სამთავრობო ცვლილებები მოულოდნელი არ აღმოჩნდა პოლიტოლოგ სოსო ცინცაძისთვის. თუმცა, ის "სახლში წამსვლელ მინისტრთა სიას" სოზარ სუბარსაც უმატებს.

"ვის შეიძლება დავემშვიდობოთ, ზუსტად ვერ გეტყვით, ეს მგონი მხოლოდ ივანიშვილმა იცის. მაგრამ არა მგონია, რომ საზოგადოების მოთხოვნა თეა წულუკიანის გადაყენებასთან დაკავშირებით შეასრულოს. თუმცა კი, გამორიცხული არაფერია. ჩვენთან, ცვლილებები განპირობებული რომ იყოს, თუ ვინ არის ეფექტური და ვინ არა, კი ბატონო, გიპასუხებდით, მაგრამ ასე ნამდვილად არ არის. ვინ კარგავს ნდობას მთავარი ადამიანის და ვინ უფრო ახლობელი ხდება მისთვის, სულ სხვა ჟანრია და წინასწარ ამის პროგნოზირება რთულია.

ზოგადად არაეფექტური მინისტრია სოზარ სუბარი. მირზა სუბელიანის სკანდალი ასე თუ ისე მასაც შეეხო. ობიექტურად ძიება თუ წავა, არ არის გამორიცხული, რომ იქ ნათესაური კავშირები, ნეპოტიზმი კიდევ გამოჩნდეს. ირიბად, მაგრამ მისმა გვარმა მიტინგებზე უკვე გაიჟღერა.

კულტურის მინისტრად მიხეილ გიორგაძის დანიშვნა საერთოდ გაუგებარი იყო. ყველაფერი, შეიძლება, მაგრამ იმპრესარიო კულტურის მინისტრად, ეს საერთოდ გინესის რეკორდების წიგნშია შესატანი, როგორც ანტირეკორდი“, - უთხრა AMBEBI.GE-ს ცინცაძემ.

მისივე თქმით, გუშინ პარლამენტში შს მინისტრის მისვლა შემთხვევითი არ ყოფილა.

„პრემიერის დონეზე ცვლილება, საპრეზიდენტო არჩევნებამდე შეიძლება გადადებულიყო, მაგრამ როგორც ჩანს, აღარ აპირებენ გადადებას. პარლამენტში გახარიას მისვლა შემთხვევითი არ იყო. ივანიშვილი ეტყობა კმაყოფილია გახარიათი. ასე თუ ისე, სწრაფად აწარმოა გამოძიება, ორი პირი დააკავა. სარალიძემ აქციაც გადადო. ასე რომ, არ არის გამორიცხული ვიხილოთ გახარია პრემიერ-მინისტრად. მას აქვს სიმტკიცე, რაც კარგია. ეს კვირიკაშვილს ნამდვილად აკლია. თუმცა ზოგადად, ამ ცვლილებებს პესიმისტურად ვუყურებ, ხალხის საკეთილდღეოდ არაფერი შეიცვლება“ - გვითხრა ცინცაძემ.

პოლიტოლოგ გია ხუხაშვილის აზრით, ივანიშვილმა პირველ რიგში სისტემური სამთავრობო ცვლილებები უნდა განახორციელოს, წინააღმდეგ შემთხვევაში, ერთი და ორი მინისტრის შეცვლის აზრს ვერ ხედავს.

"სისტემური ცვლილებებია საჭირო და ეს არ ეხება მხოლოდ პერსონალურ ცვლილებებს. მთლიანად მართველობის ალგორითმია გადასახედი. თუ დაიწყება პროცესი, შევხედავთ იმის და მიხედვით, რა იქნება, მერე ვისაუბროთ. მაგრამ სისტემური ცვლილებები აუცილებელია და ეს პირველ რიგში ხელისუფლებას სჭირდება.

ის, რომ ბიძინა ივანიშვილმა პოლიტიკაში რეინტეგრაცია მოახდინა, ნიშნავს რომ იგი ხვდება პრობლემას, წინააღმდეგ შემთხვევაში იგი არ დაბრუნდებოდა. პერსონალური საკითხები არა მგონია რომ იყოს მნიშვნელოვანი, ამიტომ ამაზე არ ვილაპარაკებ, მთლიანად მმართველობითი სისტემის ფილოსოფიაა შესაცვლელი. როცა მმართველობით სისტემას ცვლი, ეს პერსონალიებსაც შეეხება, რა თქმა უნდა. მაგრამ ეს ჯობია შემდგარ ფაქტზე ვისაუბროთ და არა წინასწარ.

ყველა შეიძლება შეიცვალოს, შეუცვლელი არავინაა. წულუკიანის მიმართ დაგროვდა ბევრი კითხვები. ასე რომ, სამთავრობო ცვლილებები არის ობიექტური აუცილებლობა", - გვითხრა ხუხაშვილმა.

ცინცაძისა და ხუხაშვილისგან განსხვავებით, ვახტანგ ძაბირაძე ცვლილებების აუცილებლობას ვერ ხედავს. მისი თქმით, ახლა ეს ცვლილებები არც ხელისუფლებას და არც საზოგადოებას არაფერს მოუტანს.

"არა მგონია, რომ ხელისუფლება სამთავრობო ცვლილებებზე ახლა წავიდეს. ასეთ ვითარებაში ჯობია „ოცნებამ“ ბოლომდე მიიყვანოს ხორავას ქუჩის გამოძიება. ვერ ვხედავ ამ შემთხვევაში ხელისუფლების ცვლილების რაიმე საფუძველს. ეს არაფერს მოუტანს არც ხელისუფლებას და არც დაზარალებულს. მიუხედავად იმისა, ვის რა დამოკიდებულება აქვს წულუკიანისადმი, ჯობია მივყვეთ პროცესს და დაველოდოთ ახალი პროკურორის შერჩევას“, - განუცხადა AMBEBI.GE-ს ძაბირაძემ.

LIVE: ალეკო ელისაშვილი და გიორგი ვაშაძე "ნიუსრუმში"

ანტიკვარული ჭაღები, ხალიჩები და საათები - რამდენი დახარჯა სალომე ზურაბიშვილმა რეზიდენციის მოსაწყობად

"პიკეტირება გაგრძელდება" - რას გეგმავენ "სირცხვილიას" ორგანიზატორები და როგორ არიან  აქციის დაშლის შედეგად დაშავებულები