"ახალი მთავარი პროკურორისგან მივიღე პირობა..." - ზაზა სარალიძის კომენტარი შალვა თადუმაძესთან შეხვედრის შემდეგ

ზაზა სარალიძე ახალ მთავარ პროკურორს შეხვდა. როგორც სარალიძემ შალვა თადუმაძესთან გამართული შეხვედრის დასრულების შემდეგ განაცხადა, მან მიიღო პირობა მთავარი პროკურორისგან, რომ ის პირად კონტროლზე აიყვანს ხორავას ქუჩაზე მომხდარ დანაშაულს და მის ირგვლივ განვითარებულ მოვლენებს.

ზაზა სარალიძის შეფასებით, პროკურატურაში გამართული შეხვედრა, რომელსაც მისთვის უცნობი მიზეზებით, საქმის პროკურორები არ ესწრებოდნენ, კონსტრუქციულად წარიმართა.

„სამწუხაროდ, საქმის ახალი პროკურორები არ ესწრებოდნენ შეხვედრას, ვისთანაც კონკრეტული კითხვები მქონდა და ველოდი კონკრეტულ პასუხებს. მაგრამ შევხვდი ახალ პროკურორს, რომელთანაც ვისაუბრე ამ დეტალებზე. შალვა თადუმაძემ სრული პასუხისმგებლობით განაცხადა, რომ ის პირად კონტროლზე აიყვანს ამ საქმეს. შეხვედრა კონსტრუქციული იყო“, - აღნიშნა ზაზა სარალიძემ.

მისივე თქმით, დღეის მდგომარეობით კონკრეტულ ვადებზე საუბარი არ შეიძლება, ვინაიდან ახალი პროკურორი საქმის დეტალებს ამ ეტარპზე ეცნობა. თუმცა იმედოვნებს, რომ უწყების მხრიდან კონკრეტული ნაბიჯები უახლოეს მომავალში გადაიდგმება.