ადამიანები მეწყერმა ცოცხლად დამარხა - აზიაში წლის ყველაზე ძლიერი ტაიფუნი მძვინვარებს

მსოფლიოში წელს ყველაზე ძლიერი ტაიფუნი „მანგჰუტი“ სამხრეთ აზიას უტევს. CNN-ის ინფორმაციით, მას შემდეგ, რაც სტიქიამ ჰონგ-კონგს გადაუარა, ფილიპინებში კი ათობით ადამიანი იმსხვერპლა, ტაიფუნმა უკვე ჩინეთამდე მიაღწია.

მანგჰუტი რეგიონში სასტიკ კვალს ტოვებს. ტაიფუნმა სამხრეთ ჩინეთში 2 ადამიანი, ფილიპინებში კი სულ მცირე 54 ადამიანი იმსხვერპლა. ფილიპინებში გარდაცვალების შემთხვევების უმეტესობა მეწყერმა გამოიწვია, ხელისუფლება ფიქრობს, რომ მიწის ქვეშ ჯერ კიდევ ბევრი ადამიანი რჩება მოყოლილი.

ნახეთ ვიდეო : კოშმარი ფილიპინებში: ტაიფუნი "მანგჰუტი" აზიის ქვეყნებში სასტიკ კვალს ტოვებს

ჩინეთის გუანგდონგის პროვინციიდან 2.45 მლნ-ზე მეტი ადამიანი ევაკუირებულია. სინჰუაში 18,327 თავშესაფარია გახსნილი.

ტაიფუნმა დიდი ზარალი მიაყენა ჰონგ-კონგსაც, ძლიერმა ქარმა შენობებს სახურავები გადახადა, მოგლეჯილია ხეები...ძლიერი წვიმისა და წყალდიდობების გამო ყველა დაწესებულება დაიხურა, ტრანსპორტის მოძრაობა შეჩერდა. დატბორილია შენობები, ქუჩები.

ქარის სიჩქარე 173 კმ-საათია, რაც ბევრად ძლიერია, ვიდრე ქარიშხალი „ფლორენსი“, რომელიც აშშ-ს უტევს. ჰონგ-კონგში გარდაცვლილების შესახებ ინფორმაცია არ ვრცელდება, ქალაქი ტროპიკული ციკლონებისთვის კარგად არის მომზადებული.