ახალშობილი დედამ ჩანთაში ჩასვა და ღობეზე ჩამოკიდა - ფილიპინელი ბიჭი შემთხვევით გადარჩა

ფილიპინებში მოზარდმა გოგონამ საკუთარი შვილი ჩანთაში ჩასვა და ღობეზე დაკიდა. ბავშვი დასუფთავების სამსახურის წარმომადგენელმა იპოვა - „დეილი მეილი“ წერს, რომ მამაკაცს ტირილის ხმა მოესმა.

ადგილზე მალე მივიდა სასწრაფო სამედიცინო დახმარების მანქანა და ბავშვი საავადმყოფოში გადაიყვანეს.

ჩანთაში ბავშვთან ერთად სასკოლო უნიფორმა და სისხლიანი თეთრეულიც იპოვეს. მსგავსი უნიფორმა საჯარო სკოლებში მეშვიდე-მეათე კლასელებს აცვიათ, მათი ასაკი 12-დან 16 წლამდეა. სავარაუდოდ, სწორედ ამ ასაკის არის ბავშვის დედა.

ინციდენტს ადგილობრივი პოლიცია იძიებს. საავადმყოფოში კი ამბობენ, რომ დაწესებულებას ბიჭის შვილად აყვანის თხოვნით უკვე არაერთმა ადამიანმა მიმართა.

ბავშვისთვის სახელი ჯერ არ შეურჩევიათ. მის ჯანმრთელობას საფრთხე აღარ ემუქრება.