წყალი ღვინის ნაცვლად - ორსული ცოლის პატივსაცემად, ჰარი სადღეგრძელოებს წყლით სვამს

პრინცმა ჰარიმ კიდევ ერთხელ დაამტკიცა, რომ ის ნამდვილად ოცნების პრინცია. სასექსის ჰერცოგისა და ჰერცოგინიას მოგზაურობას ავსტრალიასა და ფიჯიზე მთელი მსოფლიო ადევნებს თვალყურს.

ამჟამად ჰარი და მეგანი ფიჯიზე იმყოფებიან. სახელმწიფო ვახშამზე კი ღვინო წყლით მხოლოდ ორსულმა მეგანმა არ ჩაანაცვლა - სოლიდარობის ნიშნად, სადღეგრძელოებს მისი ქმარიც წყლით სვამდა.

პრინცის მხარდაჭერა შეუმჩნეველი არ დარჩათ მის თაყვანისმცემლებს. „ტვიტერის“ მომხმარებლები ჰარის საქციელით აღფრთოვანდნენ და აღნიშნავენ, რომ ახლა "ორივე ორსულად არის" და მომავალი მშობლის ამპლუას მეგანიც და პრინციც ერთნაირი პასუხისმგებლობით უდგებიან.

ოფიციალურ მიღებაზე, რომელსაც მეგანი ლამაზი, ცისფერი საღამოს კაბით ესწრებოდა, ჰარიმ მასპინძლების სადღეგრძელო შესვა და თბილი დახვედრისთვის მადლობა გადაუხადა.

სამეფო ტურის ფარგლებში სასექსის ჰერცოგი და ჰერცოგინია ახალ ზელანდიასა და ტონგოსაც ესტუმრებიან.