"ქრონიკა" - 8 წლის გოგონას მკვლელობის საქმეზე ახალგაზრდა მამაკაცია დაკავებული
„ქრონიკის“ ინფორმაციით, გორში, 8 წლის გოგონას მკვლელობის ბრალდებით ახალგაზრდა მამაკაცია დაკავებული. აღნიშნულთან დაკავშირებით შსს-ში განცხადება ცოტა ხანში გაკეთდება.
„ქრონიკის“ ინფორმაციით, დაკავებული პირი იმ საცხოვრებელ სახლში მუშაობდა მუშად, სადაც ბავშვის სისხლის კვალი იპოვეს.
შსს-ში გორში მომხდარ შემთხვევასთან დაკავშირებით ახალგაზრდა მამაკაცის დაკავებაზე კომენტარი ჯერჯერობით არ კეთდება.
2010 წელს დაბადებული ნ.ბ სახლიდან გუშინ შუადღისას გავიდა და აღარ დაბრუნებულა. რამდენიმე საათიანი ძებნის შემდეგ, ბავშვი გარდაცვლილი იპოვეს.
შინაგან საქმეთა სამინისტროს შიდა ქართლის პოლიციის დეპარტამენტის თანამშრომლებმა გოგონას ცხედარი მდინარე ლიახვის ნაპირზე იპოვეს. მომხდარ ფაქტთან დაკავშირებით გამოძიება სისხლის სამართლის კოდექსის 109-ე მუხლის მე-2 ნაწილის „ბ“ ქვეპუნქტით მიმდინარეობს, რაც წინასწარი შეცნობით არასრულწლოვნის მიმართ დამამძიმებელ გარემოებაში ჩადენილ განზრახ მკვლელობას გულისხმობს.
მომხდარ ფაქტზე გამოძიება სპეციალურმა საგამოძიებო ჯგუფმა დაიწყო, რომელსაც შინაგან საქმეთა მინისტრის პირველი მოადგილე, კახა საბანაძე ხელმძღვანელობს. მინისტრის მოადგილის თქმით, გამოძიებას უკვე აქვს კონკრეტული შედეგები:
"აქტიური საგამოძიებო მოქმედებები მიმდინარეობს. ველოდებით ექსპერტიზის პასუხს. გამოძიებას აქვს კონკრეტული შედეგები და ამაზე უახლოეს საათებში ვისაუბრებთ" - განაცხადა საბანაძემ.
"ნეტავ სცოდნოდა, რამდენად ლამაზი იყო შინაგანად და გარეგნულად..." - როგორ იხსენებენ ატენის ქუჩაზე მოკლულ დედა-შვილს
დიდ დიღომში ახალგაზრდა ბიჭის ცხედარი იპოვეს
