"დიპლომატების ბრძოლა პრეზიდენტობისთვის" - რას წერს რუსული მედია საქართველოს საპრეზიდენტო არჩევნებზე

რუსული მედია ბოლო დღეების განმავლობაში საქართველოში მიმდინარე პოლიტიკურ პროცესებს ინტერესით ადევნებს თვალს. "ვინ გაიმარჯვებს “დიმლომატების არჩევნებში"? - ფაქტია, რომ ორივე მხარეს ნაადრევად მოუწია გამარჯვების აღნიშვნამ", - წერს რუსული მედია, ნაწილი კი იმასაც მიუთითებს, რომ ქართულმა საზოგადოებამ კიდევ ერთხელ აჩვენა, რომ მზად არის ხმების დასაცავად, უფრო დემოკრატიულია ვიდრე წინა არჩევნებში და ზოგადად, დემოკრატიული პროცესები იქ გაცილებით სწრაფად მიმდინარეობს, ვიდრე რუსეთში...

ინტერნეტგამოცემა rt.com-ის ცნობით, საქართველო ევროინტეგრაციის კურსს არც ახალი პრეზიდენტის არჩევის შემდეგ შეიცვლის, თუმცა, შესაძლოა, რუსეთისგან "ახალი იმპულსების მიღების" შემთხვევაში, მის მიმართ დამოკიდებულება შეცვალოს.

მათივე ცნობით, ქართველი ამომრჩევლისთვის ორი გამოკვეთილი კანდიდატიდან არც ერთის წარსული არ იყო მისაღები, დანარჩენი შედეგები უკვე პოლიტიკურმა პარტიებამ “დადეს".

“ფრანგული აქცენტით მოსაუბრე სალომე ზურაბიშვილი, მუდმივი საკამათო ფრაზებით, რომელსაც შემდეგ ინსტრუქციას აყოლებდა; “ერთიანი ნაციონალური მოძრაობის” კანდიდატი გრიგოლ ვაშაძის წარსული, გარდა იმისა, რომ მისი პერსონა მიხეილ სააკშვილთან ასოცირდებოდა, ასევე მიუღებელი აღმოჩნდა ქართული საზოგადოებისთვის “საბჭოური კარიერის გამო”.

ჯერჯერობით ისევ არ არის ცნობილი, ვინ გაიმარჯვა - ერთი შეხედვით ყველას თავისი პრეზიდენტი ჰყავდა, თუმცა, ეგზიტპოლების შედეგების თანახმადაც, რასაც ხელისუფლებაც გარკვეულწილად აღიარებს, საქართველოში საპრეზიდენტო არჩევნების მეორე ტური გარდაუვალია... ეს ვითარებას უფრო საინტერესოს ხდის", - წერს gazeta.ru.

rbc.ru-ს ჟურნალისტის, ალექსანდრ ატასუნცევთან საუბარში რუსი ექსპერტი ნიკოლაი სილაევი ამბობს:

"საქართველოში განხორციელებული საკონსტიტუციო ცვლილებების შემდეგ, პრეზიდენტს ქვეყანაში თითქმის სიმბოლური თანამდებობა ექნება. ეს ყველაფერი იმის მტკიცებას წააგავს, ვინ არის ქვეყანაში მთავარი და ვისი მხარდამჭერები უფრო მეტნი არიან, თორემ სხვა მხრივ, რომელს რა კავშირი აქვს რუსეთთან, ამ შემთხვევაში სულაც არ არის გადამწყვეტი, რადგან ამ რეალობით, საქართველოს პრეზიდენტს უფლებამოსილება არ აქვს საქართველო-რუსეთის ურთიერთობაში რაიმე ცვლილებები შეიტანოს...” - ამბობს რუსი ექსპერტი.

გამოცემის ცნობით, საქართველოს ერთ-ერთ მთავარ სავაჭრო პარტნიორად ისევ რუსეთი რჩება, რომელიც მეორე ადგილზეა, პირველზეა თურქეთი და მესამეზე - ჩინეთი.

“საქართველოს სტატისტიკის სამსახურის ცნობით, ქვეყნებს შორის სავაჭრო ბრუნვა, 2017 წელს 34,2 %-ით გაიზარდა... ტურისტული ადმინისტრაციის ცნობით, საქართველოში ჩასული ტურისტების მეტი წილი ისევ რუსეთზე მოდის და ის ტურისტების რაოდენობით, მესამე ადგილზეა... თითქმის თანაბარი რაოდენობით ჩადიან სომხეთიდან და აზერბაიჯანიდან, შემდეგ მოდის თურქეთი და მესამეა რუსეთი...” - წერს გამოცემა და მიანიშნებს, რომ რუსეთთან ურთიერთობის დალაგება ორივე ქვეყნის ინტერესებში უნდა შედიოდეს.

Кавказский Узел-ის ინფორმაციით, საქართველოს თითქმის ყველა დიდ ქალაქში გრიგოლ ვაშაძემ გაიმარჯვა, მასა და ზურაბიშვილის მიერ აღებულ ხმებს შორის 1%-იანი განსხვავებაც არ არის, რაც ნიშნავს, რომ მეორე ტური გარდაუვალია და თუ ვაშაძემ გაიმარჯვა, შესაძლოა, საქართველოში მიხეილ სააკაშვილი დაბრუნდეს.

კიდევ ერთი, რის გარშემოც რუსი ინტერნეტმომხმარებლები მსჯელობენ, "პოსტსაბჭოთა ქვეყანის" ქართველი ამომრჩეველი და საარჩევნო გარემოა, რომელიც ბევრად თავისუფალი და დემოკრატიულია, ვიდრე რუსეთში.

“ამ არჩევნებმა დაგვანახა, რომ საქართველოს პრეზიდენტი გახდება ის, ვისაც ქართველი ერი ირჩევს და თუ არ იქნება მათთვის მისაღები, ჩვენგან განსხვავებით, სადაც “მეფე ერთია და შეუცვლელი”, მას შეცვლიან", - წერენ Кавказский Узел-ის მომხმარებელი.

“თუკი მას რუსეთში, მარტში ჩატარებულ საპრეზიდენტო არჩევნებს შევადარებთ, ძალიან დიდ განსხვავებას დავინახავთ - საქართველოსთან შედარებით რუსეთში ტოტალიტარიზმია. იმდენად თავდაჯერებული იყო პუტინი, რომ წვრილფეხა ოპოზიციონერები მას დისკომფორტსაც ვერ უქმნიდნენ. ამიტომაც როგორც ყველა დიქტატორმა, პუტინმაც, რომელსაც თუ მის მიერ მართული ტელევიზიების პროპაგანდას არ ჩავთვლით, სიმბოლური პიარკამპანიაც კი არ დასჭირვებია - აბსოლუტური უპირატესობით გაიმარჯვა" - წერს ინტერნეტმომხმარებელი, რომლის თქმითაც "საქართველოში რუსეთისგან განსხვავებით “მეფეები” პოსტზე სიკვდილამდე არ რჩებიან".