ლილოში სამარშრუტო ტაქსი გადაბრუნდა - არიან დაშავებულები
თბილისში, ლილოს მიმდებარე ტერიტორიაზე ყვითელი სამარშუტო ტაქსი გადაბრუნდა, რომელშიც მგზავრები იმყოფებოდნენ.
როგორც "ინტერპრესნიუსს" თვითმხილველებმა ადგილიდან აცნობეს, ავარიის დროს, ერთმანეთს ოთხი სატრანსპორტო საშუალება შეეჯახა, მათ შორის, ორი ყვითელი მიკროავტობუსი. შეჯახების შედეგად, ერთ-ერთი "მარშრუტკა" გადაბრუნდა.
შსს-ს ინფორმაციით, მსხვერპლი არ არის, თუმცა არიან დაშავებულები. შემთხვევის შედეგად, 8 ადამიანი დაშავდა და მათი ჯანმრთელობის მდგომარეობა საშუალო სიმძიმისაა. დაშავებული 6 მოქალაქე საავადმყოფოებში გადაიყვანეს.
როგორც „ინტერპრესნიუსს“ სასწრაფო სამედიცინო დახმარების ცენტრში განუცხადეს, დაშავებულები ე.წ. არამიანცის კლასტერში არიან გადაყვანილი, კერძოდ, ორი მათგანი მოთავსებულია ინგოროყვას კლინიკაში, სამი - „ამტელში“ და ერთი გადაუდებელი ქირურგიის ცენტრში.
ავტოსაგზაო შემთხვევის მიზეზზე „თბილისის მიკროავტობუსი“ საუბრობს. როგორც „ინტერპრესნიუსს“ კომპანიაში განუცხადეს, არ იკვეთება 165 ნომერი მიკროავტობუსის მძღოლის ბრალეულობა, რომელი სატრანსპორტო საშუალებაც გადაბრუნდა.
„ლილოს მიმდებარედ გზაზე ერთმანეთს 4 ავტომობილი შეეჯახა. თავდაპირველად „მერსედესის“ მარკის ავტომობილს ტრაილერი შეეჯახა, რამაც ყვითელ მიკროავტობუსზე დაჯახება გამოიწვია და აღნიშნული მიკროავტობუსი მეორე ყვითელ მიკროავტობუსს დაეჯახა, რომელიც შემთხვევის შედეგად გადაბრუნდა“, - განაცხადეს კომპანიაში.
„ერთ-ერთი მიკროავტობუსი გადაბრუნდა. საშუალო სიმძიმის დაზიანებები აქვს მიღებული 8 ადამიანს, თუმცა ყველა ადამიანი გონზეა. მსხვერპლი არ არის“, - განაცხადეს შსს-ში. უწყების ინფორმაციით, გამოძიება 276-ე მუხლით დაიწყო.
შემთხვევის ამსახველი ფოტოები სააგენტოს თვითმხილველმა მიაწოდა.
"ნეტავ სცოდნოდა, რამდენად ლამაზი იყო შინაგანად და გარეგნულად..." - როგორ იხსენებენ ატენის ქუჩაზე მოკლულ დედა-შვილს
დიდ დიღომში ახალგაზრდა ბიჭის ცხედარი იპოვეს
