"ფეისბუქზე" მოზარდი პატარძალი 500 ძროხის, მანქანების და 10 000 დოლარის სანაცვლოდ გაიყიდა

სუდანელი მოზარდი პატარძალი ოჯახმა „ფეისბუქზე“ მოწყობილი აუქციონის საშუალებით გაყიდა, ინფორმაციას Huffington Post ავრცელებს. ბავშვთა უფლებების დაცვის ასოციაციის განცხადებით, სოციალური ქსელი თანამედროვე მონების ბაზრობად გამოიყენეს.

„ფეისბუქის“ წარმოამდგენელმა განაცხადამ რომ პოსტი 9 ნოემბერს აღმოაჩინეს და მაშინვე წაშალეს, თუმცა CNN-ის ინფორმაციით, ეს მხოლოდ აუქციონის დაწყებიდან მეთხუთმეტე დღეს მოხდა, გოგონა უკვე გათხოვილი იყო.

გოგონა საკუთარმა მამამ 500 ძროხის, სამი მანქანის და 10 ათასი დოლარის სანაცვლოდ გაყიდა. ორგანიზაციის Plan International ინფორმაციით, აუქციონში მონაწილეობა ხუთმა მამაკაცმა მიიღო, მათ შორის სამხრეთ სუდანის მაღალი თანამდებობის პირებიც იყვნენ.

გოგონა 16 წლისაა.

Plan International-ის სამხრეთ სუდანის წარმომადგენლობის დირექტორმა, ჯორჯ ოტიმმა განაცხადა, რომ აუცილებელია, გამოძიება დაიწყოს.

„ტექნოლოგიის ბარბაროსული გამოყენება მონების თანამედროვე ბაზარს გვახსენებს. დაუჯერებელია, რომ გოგონა, შესაძლოა, დაქორწინების მიზნით მსოფლიოს უმსხვილესი სოციალური ქსელის საშუალებით აუქციონზე გაიყიდოს,“ - ამბობს ოტიმი.