CNN-ზე გაბრაზებული ტრამპი ახალი სატელევიზიო ქსელის შექმნას გეგმავს

ტრამპს CNN არ მოსწონს და აპირებს, ახალი სატელევიზიო ქსელი შექმნას

დონალდ ტრამპი ტელეკომპანია CNN-ს კიდევ ერთხელ დაესხა თავს და აღნიშნა, რომ მსოფლიოს მასშტაბით აშშ-ს შესახებ არასწორად ავრცელებს ინფორმაციას. აშშ-ს პრეზიდენტი „ტვიტერზე“ წერს, რომ მსოფლიო აუდიტორიისთვის ახალი სატელევიზიო ქსელი შეიქმნება.

„მიუხედავად იმისა, რომ აშშ-ში CNN-ის საქმეები არცთუ ისე კარგად მიდის რეიტინგებიდან გამომდინარე, აშშ-ს ფარგლებს გარეთ მას ცოტა კონკურენტი ჰყავს. მსოფლიოს მასშტაბით CNN-ს მძლავრი ხმა აქვს და აშშ-ს მიკერძოებულად და არასამართლიანად აშუქებს. რაღაც უნდა გაკეთდეს, მათ შორის არის აშშ-ს მიერ საკუთარი მსოფლიო სატელევიზიო ქსელის შექმნის შესაძლებლობა, რათა მსოფლიოს დავანახოთ, თუ ვინ ვართ რეალურად, რომ დიადები ვართ!“ - განაცხადა დონალდ ტრამპმა სოციალურ ქსელში.

„ინდეფენდენთი“ წერს, რომ აშშ-ს ხელისუფლება რამდენიმე საინფორმაციო პროგრამას უკვე აფინანსებს დამოუკიდებელი სახელისუფლებო სააგენტოს - „აშშ-ს სააგენტო საერთაშორისო მედიისთვის“ საშუალებით, მათ შორის არის საერთაშორისო რადიოგადაცემა „ამერიკის ხმა“ და რამდენიმე გამოცემა, რომლებმაც მილიარდერ ფინანსისტზე ჯორჯ სოროსზე მწვავე სტატიები დაწერეს.

ეს არ არის პირველი შემთხვევა, როდესაც ტრამპი საერთაშორისო სატელევიზიო ქსელის შექმნის ინიციატივით გამოვიდა. „ინდეფენდენთი“ წერს, რომ პირველად განცხადება მედიასაშუალების შესახებ მან 2016 წელს გააკეთა.