შინაგან საქმეთა სამინისტრო მართლწესრიგის ოფიცრის თანამდებობაზე ვაკანსიას აცხადებს. მართლწესრიგის ოფიცერი შსს-სს ახალი საპოლიციო ინსტიტუტია, რომლის უმთავრესი მიზანია დანაშაულის პრევენცია. მართლწესრიგის ოფიცერი იქნება უფრო მეტად დამაკავშირებელი ხიდი პოლიციასა და საზოგადოებას შორის, იმისათვის, რომ შედგეს ეფექტიანი, ინტენსიური კომუნიკაცია და ჩამოყალიბდეს მეტი ნდობა, რაც დანაშაულის თავიდან არიდების ერთ-ერთი აუცილებელი შემადგენელი ნაწილია.
მართლწესრიგის ოფიცერი ორიენტირებულია იზრუნოს საზოგადოებრივ უსაფრთხოებაზე, კომპლექსურად უზრუნველყოს მართლწესრიგი და შეძლებისდაგვარად დაეხმაროს მოქალაქეებს საზოგადოებრივი და სამოქალაქო პრობლემების გადაწყვეტაში. ეს ინსტიტუტი პირველ ეტაპზე თბილისში, საპილოტე რეჟიმში დაინერგება და ეტაპობრივად, მთელი ქვეყნის მასშტაბით გაფართოვდება.