ელონ მასკის თქმით, თუ სამყაროს შეცვლა გსურთ, კვირაში 80 საათი უნდა იმუშაოთ

ელონ მასკი ამბობს, რომ „სამყარო რომ შეცვალონ", ადამიანებმა კვირაში 80-დან 100 საათამდე უნდა იმუშაონ. „ბიზნეს ინსაიდერის“ ინფორმაციით, SpaceX-ის დამფუძნებელმა ამის შესახებ „ტვიტერზე“ დაწერა.

„ბევრი მარტივი სამუშაოს პოვნა შეიძლება, თუმცა კვირაში 40 საათიანი მუშაობით სამყარო არავის შეუცვლია,“ - დაწერა მასკმა.

სოციალური ქსელის მომხმარებლების კითხვაზე, კვირაში რამდენსაათიანი მუშაობაა საჭირო სამყაროს შესაცვლელად, მასკის პასუხი იყო 80-დან 100 საათამდე.

„ეს დამოკიდებულია ადამიანზეც, მაგრამ სტაბილურად დაახლოებით 80 საათი, ხან 100-იც“ - განაცხადა მასკმა.

„ტესლამ“, SpaceX-მა და The Boring Company-მ დამფუძნებლის განცხადებაზე სამუშაო საათების შესახებ „ბიზნეს ინსაიდერთან“ კომენტარი არ გააკეთეს.

ნოემბერში ერთ-ერთ ინტერვიუში ელონ მასკმა განაცხადა, რომ კვირაში 120 საათი მუშაობს, „ტესლას“ ყველა თანამშრომლის სამუშაო საათები კი კვირაში 100-ით განისაზღვრება. მისი თქმით, სამუშაო საათების ზრდა კომპანიის გადარჩენისთვის აუცილებელი იყო.